Maliyyə

Ana səhifə

Maliyyə

İqtisadi Tədqiqatlar Mərkəzi 2009-cu ilin yekunlarına dair konfrans keçirib

11 mart 2010 10:18 (UTC +04:00)

Bakı. Elnur Hüseynquluyev - APA-Economics. Bu gün Bakıda İqtisadi Tədqiqatlar Mərkəzinin (İTM) «İTM-2009-cu ildə: yekun-hesabat konfransı» keçirilib.

«APA-Economics»in məlumatına görə, tədbirdə İTM İdarə Heyətinin sədri Qubad İbadoğlu mərkəzin fəaliyyəti ilə bağlı hesabat təqdimatı ilə çıxış edib.

İTM-in indiyədək həyata keçirdiyi layihə və proqramları haqqında danışan Q.İbadoğlu mərkəzin 2010-cu ilin cari planları haqqında da məlumat verib. Onun sözlərinə görə, İTM 2009-cu ildə 13 donor təşkilatla 14 layihə çərçivəsində effektiv əməkdaşlıq edib. Həmçinin ötən il ərzində həyata keçirilən layihələr çərçivəsində İTM tərəfindən dövlətə 22,601 min manat vergi və sosial ödənişlər edilib. Bu müddət ərzində müxtəlif məsələlərlə bağlı 9 konfrans, 9 dəyirmi masa, 12 təqdimat və ictimai müzakirələr, 2 təlim və seminar, 1 radiodebat təşkil olunub. İctimai xarakterli tədbirlərin hər birində orta hesabla 30-dan yuxarı xarici və yerli mütəxəssis, beynəlxalq təşkilat və xarici ölkə səfirliklərinin, həmçinin 15-dək KİV nümayəndələrinin iştirakı təmin olunub.

İTM sədri daha sonra bu il üçün nəzərdə tutulan planlardan danışıb. Sədr İTM-in gələcək planları sırasına iqtisadi və kommersiya fəaliyyətinin genişləndirilməsi, dövlət sifarişlərinə və tenderlərə müraciətlər edilməsi, həmçinin dünya beyin mərkəzləri ilə ikitərəfli əlaqələrin qurulması kimi məsələlərin daxil olduğunu qeyd edib.

İTM-in çətinliklərindən danışan Q.İbadoğlu ölkədə vətəndaş cəmiyyəti institutlarının dövlət proqramlarında iştirakının məhdud olduğunu bildirib: “Bundan başqa, özəl bölmə ilə tərəfdaşlıq imkanlarının zəifliyi, insan və maliyyə resurslarının çatışmazlığı, eyni zamanda azad mətbuata qarşı basqıların olması bizə çətinlik yaradan amillərdəndir”.

Q.İbadoğlunun təqdimatından sonra tədbir müzakirələrlə davam etdirilib.