Maliyyə

Ana səhifə

Maliyyə

Azərbaycan bank sistemində likvidlik problemi daha da kəskinləşib

12 mart 2010 08:12 (UTC +04:00)

Bakı. Vahab Rzayev – APA-Economics. Azərbaycan Mərkəzi Bankı tərəfindən bank sistemində likvidliyin idarə edilməsi çərçivəsində yenidənmaliyyələşdirmə əməliyyatlarının həcmi 2010-cu ilin fevral ayın 1-nə 1 550,7 mln. manat təşkil edib ki, bu da ötən ilin müvafiq dövrü ilə müqayisədə 6,8 dəfə çoxdur. Azərbaycan Mərkəzi Bankından «APA-Economics»ə verilən məlumata görə, cari ilin yanvar ayında AMB tərəfindən bank sisteminə birbaşa yönəldilmiş mərkəzləşdirilmiş kreditlərin həcmi 235,3 mln. manat və ya 17,9% artıb.

Beləliklə, cari ilin yanvar ayında Azərbaycan bank sistemində likvidliyin mərkəzləşdirilmiş yol ilə artırılması ehtiyacı hələ də mövcud olub. Yanvardan sonrakı dövr üzrə rəsmi statistika hələ açıqlanılmayıb və bu səbəbdən fevraldakı dinamika barədə konkret fikir söyləmək çətindədir. Ümumilikdə, Azərbaycan banklarının böhrana yüksək davamlılıq göstərməsi barədə bəyanatlar fonunda bankların Mərkəzi Bankdan likvidliyin cəlb edilməsi ehtiyacının olduğu etiraf edilməlidir.

Hətta yanvar dinamikası vəziyyətin bir qədər kəskinləşdiyini göstərir. Belə ki, yenidənmaliyyələşdirmənın kəskin artımı müşahidə olunan 2009-cu ilin statistikasına əsasən, orta aylıq artım 90,5 mln. manata bərabər olub ki, bu da yanvar göstəricisindən 2,6 dəfə azdır.

Maraqlıdır ki, bununla paralel bank sistemində likvidlik artımı da müşahidə olunur – bu barədə Mərkəzi Bankın notları üzrə keçirilən son hərracların yekunları da xəbər verir. Belə ki, martın 10-da keçirilmiş son hərrac zamanı təklif 4 mln. manat olduğu halda, tələbatın həcmi 60 mln. manatdan artıq olub. Lakin qeyd etmək lazımdır ki, ifrat likvidlik yalnız bəzi banklarda müşahidə olunur ki, bu da ilk növbədə kreditləşmənin məhdudlaşdırılması ilə bağlıdır.