Maliyyə

Ana səhifə

Maliyyə

Son 6 il ərzində Azərbaycanda ÜDM 2,8 dəfə artıb

13 mart 2010 08:24 (UTC +04:00)

«APA-Economics»in məlumatına görə, bu fikirləri Azərbaycanın iqtisadi inkişaf naziri Şahin Mustafayev «Azərbaycan regionlarının 2009-2013-cü illərdə sosial-iqtisadi inkişafı Dövlət Proqramı»nın icrasının birinci ilinin yekunlarına dair keçirilən tədbirdə bildirib.

Nazir qeyd edib ki, 2004-2009-cu illər ərzində ümumi daxili məhsul (ÜDM) 2,8 dəfə, dövlət büdcəsinin gəlirləri 4,8 dəfə, orta aylıq əməkhaqqı 3 dəfə, minimum pensiyanın məbləği 3,8 dəfə, minimum əməkhaqqı 6,3 dəfə artıb, 33 mindən artıq yeni müəssisə, 840 mindən artıq yeni iş yeri açılıb, yoxsulluğun səviyyəsi 4,1 dəfə azalaraq 11%-əə enib.

Ötən ilin makroiqtisadi göstəricilərinə gəldikdə isə, Ş.Mustafayev bildirib ki, ÜDM 9,3%, onun adambaşına düşən həcmi 7,9%, qeyri-neft sektoru 3,2% artıb. Ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala 7,4 mlrd. manat, o cümlədən regionlar üzrə 2,9 mlrd. manat investisiya yönəldilib, bu vəsaitlər hesabına infrastruktur təminatının daha da yaxşılaşdırılması və dünya standartlarına uyğunlaşdırılması ilə bağlı layihələr icra olunub.

Hesabat dövründə regionlarda bir sıra layihələrin icra olunduğundan danışan nazir həmçinin qeyd edib ki, 2009-cu ildə yaşayış məntəqələrinin qaz təchizatı üçün yeni qaz kəmərləri çəkilib, 63 kəndə qazın verilməsi bərpa edilib, su və kanalizasiya təchizatının yaxşılaşdırılması ilə bağlı beynəlxalq maliyyə institutları ilə birgə 62 şəhər və rayonu əhatə edən layihələrin icrası davam etdirilib: «Rabitə xidmətlərinin yaxşılaşdırılması məqsədilə regionlarda 74 telefon stansiyası quraşdırılıb, 80 poçt binası inşa edilib, ölkənin bütün ərazisini əhatə edən internet şəbəkəsinin yaradılması üzrə işlər davam etdirilib».

Ş. Mustafayev onu da bildirib ki, aqrar sektorda mövcud olan potensialdan daha səmərəli istifadə edilməsi, bu sahədə məhsul ixracının artırılması məqsədilə məhsulların tədarükü, saxlanılması və satışı üzrə müasir anbar komplekslərinin tikintisi üçün Sahibkarlığa Kömək Milli Fondu tərəfindən 32 sahibkarlıq subyektinə 48 mln. manat məbləğində güzəştli kreditlər verilib: «Tikintisi başa çatmış komplekslərin fəaliyyətə başlaması artıq istehlak bazarına öz müsbət təsirini göstərib. Cari il ərzində digər komplekslərin istifadəyə verilməsi planlaşdırılır».

Nazir həmçinin qeyd edib ki, 2009-cu ildə 44-ü regionlarda olmaqla, 63 səhiyyə müəssisəsi tikilib istifadəyə verilib, 62-si regionlarda olmaqla, 87 məktəb binası tikilib və əsaslı təmir olunub, bədən tərbiyəsi və idman sahəsində işlər davam etdirilib, 7 olimpiya idman kompleksi, Bakı Tennis Akademiyası istifadəyə verilib, Bakıda Gimnastika Kompleksinin təməli qoyulub.