Maliyyə

Ana səhifə

Maliyyə

«Aqrarkredit» ötən il kənd yerlərinin kreditləşməsi xətti ilə 5,479 mln. manat kredit ayırıb

16 mart 2010 12:22 (UTC +04:00)

Bakı. Elnur Hüseynquluyev - APA-Economics. Azərbaycanın «Aqrarkredit» qeyri-bank kredit təşkilatının aktivlərinin həcmi cari ilin yanvar ayının 1-nə 25,336 mln. manat, kredit portfeli isə 16 mln. manat təşkil edib.

«APA-Economics»in məlumatına görə, bunu «Aqrarkredit»in İdarə Heyətinin sədri Məmməd Musayev bu gün keçirilən mətbuat konfransında bildirib.

Öncə ölkədə sahibkarlığın inkişafı ilə bağlı həyata keçirilən layihələrdən və bu layihələr nəticəsində əldə olunmuş nailiyyətlərdən danışan M.Musayev 2010-cu il ərzində də bu sahədə müvafiq işlərin görüləcəyini bildirib. Daha sonra o, «Aqrarkredit»in 2009-cu ildəki fəaliyyətindən danışıb: «Təşkilat ötən il ərzində öz vəsaiti hesabına kənd yerlərinin kreditləşməsi xətti ilə 559 sahibkarlıq subyektinə 5,479 mln. manat, o cümlədən heyvandarlığın inkişafına 2,102 mln. manat, bitkiçiliyə 734 min manat, ticarət və xidmət sahələrinə 2,534 mln. manat, digər sahələrə isə 108 min manat həcmində kredit xidməti göstərib».

M.Musayevin sözlərinə görə, verilmiş kreditlər üzrə ödəniş əmsalı 97% təşkil edib. Həmçinin müvəkkil kredit təşkilatı olaraq Sahibkarlığa Kömək Milli Fondunun vəsaitləri hesabına ötən il ərzində 282 sahibkarlıq subyektinə 1,841 mln. manat kredit verilib.

Ötən il ərzində təşkilatın ümumi gəlirləri 4,184 mln. manat, xərcləri isə 4,067 mln. manat olub. Nəticədə təşkilatın ötən il əldə etdiyi mənfəətin həcmi 117 min manat təşkil edib.

Xatırladaq ki, təsisçisi Azərbaycan Maliyyə Nazirliyi (99,98%), «Azərsığorta» Dövlət Sığorta Kommersiya Şirkəti və digər dövlət təşkilatları olan «Aqrarkredit» qeyri-bank təşkilatı 2001-ci ildən fəaliyyət göstərir. Cari ilin yanvar ayının 1-nə təşkilatın məcmu kapitalı 14,275 mln. manata, o cümlədən nizamnamə kapitalı 18,535 mln. manata çatıb. Hazırda qurumun ölkə üzrə 12 filialı və 4 nümayəndəliyi mövcuddur.