Maliyyə

Ana səhifə

Maliyyə

Azərbaycan Beynəlxalq Bankı islam bankçılığının tətbiqinə hazırlaşır

18 mart 2010 07:33 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankı 2010-cu il ərzində islam bankçılığının tətbiqinə başlamaq niyyətindədir. «APA-Economics»in məlumatına görə, bunu ABB-nin İdarə Heyətinin sədri Cahangir Hacıyev bildirib.

C.Hacıyevin sözlərinə görə, hazırda ABB bir sıra islam bankları ilə əməkdaşlıq edir. Lakin Azərbaycanda bu sahədə müvafiq normativ-hüquqi baza olmadığı üçün həmin əməkdaşlıq münasibətləri rəsmiləşdirilmir. Lakin artıq bu istiqamətdə də iş aparılır.

C.Hacıyev bildirib ki, bu prinsiplərin Azərbaycanda tətbiqi müəyyən xarici maliyyə resurslarına çıxışın əldə olunması deməkdir.

Xatırladaq ki, Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur. Cari ilin yanvar ayının 1-nə bankın aktivlərinin həcmi 5 071,879 mln. manat, depozit portfeli 1 997,558 mln. manat, kredit portfeli 3 911,718 mln. manat, məcmu kapitalı 498,989 mln. manat, o cümlədən nizamnamə kapitalı 240 mln. manat təşkil edib. Bankın ölkə üzrə 37 filialı, 587 bankomatı, 2 692 POS- terminalı, 1 240 işçisi və 886 292 (24 679 hüquqi, 861 613 fiziki) müştərisi mövcuddur.