Maliyyə

Ana səhifə

Maliyyə

Azərbaycan parlamenti Səudiyyə İnkişaf Fondu ilə imzalanmış kredit sazişini təsdiq etməyə hazırlaşır

18 mart 2010 07:50 (UTC +04:00)

Bakı. Elbrus Seyfullayev - APA. Bu gün Azərbaycan Milli Məclisi təbii ehtiyatlar, energetika və ekologiya komitəsinin iclası keçirilib. APA-nın xəbərinə görə, parlamentin sədr müavini, təbii ehtiyatlar, energetika və ekologiya komitəsinin sədri Valeh Ələsgərov iclası açaraq gündəlikdə iki məsələnin olduğunu bildirib. Əvvəlcə «Elektroenergetika haqqında», «Qaz təchizatı haqqında» və «Su təchizatı və tullantı suları haqqında» qanunlara təklif edilən əlavələr müzakirə olunub.

Toplantıda bildirilib ki, adları çəkilən qanunlara təklif edilən əlavələrə əsasən, yaşayış binaları, o cümlədən, mənzillər elektrik və qaz xətlərinə, su təchizatı sisteminə tam qoşulduqdan sonra istismara qəbul üçün Dövlət Qəbul Komissiyasına təqdim edilə bilər.

İclasda həmçinin «Azərbaycanla Səudiyyə İnkişaf Fondu arasında Bakı ərazisi üzrə su təchizatı və kanalizasiya sisteminin yenidən qurulması və genişləndirilməsi Layihəsi üzrə Kredit Sazişi»nin təsdiq edilməsi məsələsinə baxılıb.

İclasda bildirilib ki, layihə çərçivəsində Bakı şəhərinin Bibiheybət zonasında yerləşən «20-ci sahə» adlanan yaşayış massivinin və ona bitişik ərazilərdəki yaşayış sahələrində su təchizatı və kanalizasiya xidmətlərinin beynəlxalq standartlara uyğun şəkildə təmin edilməsi planlaşdırılır. Azərbaycanla Səudiyyə İnkişaf Fondu arasında imzalanmış kredit sazişi çərçivəsində bu layihənin maliyyələşdirilməsi üçün 93,75 mln. Səudiyyə rialının (təxminən 25 mln. ABŞ dolları) ayrılması nəzərdə tutulur. Sazişin şərtlərinə əsasən, su təchizatı sistemlərinin yenidən qurulmasına xərclənəcək kredit vəsaiti ilk 5 ili güzəştli olmaqla 20 il müddətinə, illik 2% dərəcəsi ilə ayrılır.

Müzakirələrdən sonra hər iki sənəd parlamentə tövsiyə olunub.