Maliyyə

Ana səhifə

Maliyyə

Çinin qızıl ehtiyatları tükənir

30 mart 2010 14:06 (UTC +04:00)

Bakı. Nicat Mustafayev - APA-Economics. Yaxın 10 il ərzində Çində qızılın istehlakı 2 dəfə arta bilər.

«APA-Economics»in RBK-ya istinadən verdiyi məlumata görə, bu proqnozla Ümumdünya Qızıl Şurasının («World Gold Council», WGC) ekspertləri çıxış edib.

Hazırda Çin qızıla olan tələbat fonunda bu qiymətli metalın hasilatını artırır. Lakin ölkənin bu sahədə imkanları məhduddur və proqnozlara əsasən, 6 ildən sonra Çinin qızıl yataqlarındakı ehtiyatlar qurtaracaq. Bu da öz növbəsində dünya bazarında qızıla olan tələbatla təklifin nisbətinə təsir edə bilər.

Ötən il Çində qızılın istehlakı 423 tona çatıb ki, bu da pul ekvivalentində 14 mlrd. ABŞ dollarından çoxdur. Çində 2009-cu ildə istehlak olunmuş qızılın dünya qızıl istehlakındakı payı 11%-ə bərabər olub. Bununla yanaşı, 2009-cu ildə Çin dünya bazarına 314 ton qızıl göndərib.

Hazırda Çinin qızıl ehtiyatı ümumi dünya ehtiyatının 4%-ni təşkil edir və 1992-ci ildən etibarən bu ölkənin qızıl hasilatı artmaqda davam edir. Belə ki, son 10 il ərzində Çinin qızıl hasilatı 12% artıb, son 5 ildə isə bu ölkədə qızılın istehlakı 13% çoxalıb.

Bunun nəticəsi olaraq WGC-nin mütəxəssisləri bildirir ki, Çində qızıl ehtiyatının məhdud olması və bu növ qiymətli metalın istehlakının artması ölkəni qızılın idxalından asılı olan ölkəyə çevirir. Bu isə öz növbəsində dünya bazarında qızılın qiymətinin yüksək səviyyədə qalmasını təmin edə bilər.