Maliyyə

Ana səhifə

Maliyyə

«Azərbaycan Sənaye Bankı» «Contact» pulköçürmə sistemi üzrə xidmətlərə başlayıb

31 mart 2010 09:37 (UTC +04:00)

Bakı. Elnur Hüseynquluyev – APA-Economics. «Azərbaycan Sənaye Bankı» ASC «Contact» beynəlxalq pulköçürmə sistemi üzrə xidmətlərə başlayıb. Bunu «APA-Economics»ə bankın İdarə Heyətinin sədr müavini Həsən Bədəlov bildirib.

H.Bədəlovun sözlərinə görə, hazırda müştərilər bu sistemin ximətlərindən bankın yalnız baş ofisində istifadə edə bilər. Daha sonra bu xidmət bankın bütün filiallarında tətbiq ediləcək.

H.Bədəlov həmçinin bankın bu il ərzində «Zolotaya Korona» sisteminə də qoşulacağını bildirib: «Hazırda bankın bir qrup mütəxəssisi tərəfindən bu sistemin özəllikləri, bankın bu sistemə üzv olması üçün tələb edilən müvafiq sənədlər və digər detallar araşdırılır».

Xatırladaq ki, «Contact» geniş şəbəkəyə malik olan bir sistemdir. Rusiyanın 400 şəhərində 1100-dən artıq məntəqəyə malik olan 221 bank bu sistemin iştirakçısıdır. «Contact» həmçinin bütün MDB və Baltikyanı ölkələrlə də işləyir. Burada iştirakçı qismində 1000-dən artıq şəhərdə özünün 4150 məntəqəsi ilə 60 bank çıxış edir.

Sistem eyni zamanda Bolqarıstanın və Litva, Bosniya və Herseqovinanın bankları ilə işləyir. Sistem Belçika, Böyük Britaniya, Almaniya, İsrail, İran, İspaniya, Kanada, Birləşmiş Ərəb Əmirlikləri, Portuqaliya, Polşa, ABŞ, İsveçrə və İsveçin praktiki olaraq bütün dünyada şöbə və agentliklərə malik olan 24 maliyyə şirkəti ilə işləyir.

Ən yaxın zamanda tərəf-müqabillərə Finlandiya, İspaniya, ABŞ və Rumıniyadan yeni şirkətlər qoşulacaq. Bütövlükdə, «Contact» sistemi üzrə dünyanın 80 ölkəsinə pul köçürmələri həyata keçirmək mümkündür.

Azərbaycanda isə «Contact» sistemi ilə 70-ə yaxın xidmət məntəqəsinə malik olan 7 bank əməkdaşlıq edir.

Qeyd edək ki, «Azərbaycan Sənaye Bankı» hazırda həcmçinin «Western Union», «Migom», «Caspian Money Transfer» pulköçürmə sistemlərinin üzvüdür.

Xatırladaq ki, «Azərbaycan Sənaye Bankı» 1996-cı ildə «CI Bank» kimi fəaliyyətə başlayıb və 2006-cı ilin sonunda brendini dəyişib.