Maliyyə

Ana səhifə

Maliyyə

Ötən il İqtisadi İnkişaf Nazirliyinə edilən müraciətlərin əsas hissəsi xarici iqtisadi və ticarət fəaliyyəti ilə bağlı olub

01 aprel 2010 06:50 (UTC +04:00)

Bakı. Nicat Mustafayev – APA-Economics. Ötən il ərzində Azərbaycan İqtisadi İnkişaf Nazirliyinə 11 533 müraciət daxil olub.

Nazirlikdən «APA-Economics»ə verilən məlumata görə, bu müraciətlərin 609-u (5,3%) hüquqi normativ xarakterli olmaqla 1 941-i (16,8%) yuxarı dövlət orqanlarından, 4 243-ü (36,8%) mərkəzi icra hakimiyyəti və onlara bərabər tutulan icra hakimiyyəti orqanlarından, 2 046-sı (17,7%) digər idarə, müəssisə və təşkilatlardan, 1 391-i (12,1%) xarici və beynəlxalq təşkilatlardan, 1 301-i isə (11,3%) vətəndaşlardan daxil olub.

Korrespondensiyaların 5 980-i (51,8%-i və yaxud 2008-ci illə müqayisədə 2 412 çox) icra təyinatlı olub ki, bunların da 15%-i aidiyyəti üzrə tabeli qurumlara göndərilib.

Daxil olan müraciətlərin təqribən 8%-i (927) xarici investisiya fəaliyyəti, 23,3%-i (2 691) xarici iqtisadi və ticarət fəaliyyəti, 15,3%-i (1 768) daxili investisiya fəaliyyəti və dövlət proqramları, 12,8%-i (1 474) sahibkarlıq hüquqlarının müxtəlif aspektlərinin təmin edilməsi, 4,5%-i (515) güzəştli kreditlərin əldə edilməsi, 2%-i isə (230) istehlak hüquqlarının pozulması və ya antiinhisar fəaliyyəti ilə əlaqədar olub.

Bundan başqa, hesabat ilində Nazirlikdən 6 814 korrespondensiya göndərilib (1 159 çox). Ən çox korrespondensiya dekabr ayında (767), ən az isə fevral ayında (439) göndərilib. Xaric olan məktubların 1 230-u (18%) yuxarı dövlət orqanlarına, 2 371-i (34,8%) mərkəzi icra hakimiyyəti orqanları və onlara bərabər tutulan digər dövlət orqanlarına, 1 485-i (21,8%) digər idarə, müəssisə və təşkilatlara, 390-ı xarici və beynəlxalq təşkilatlara, 511-i (7,5%) tabeli qurumlara, 582-si isə (8,5%) vətəndaşlara göndərilib.