Maliyyə

Ana səhifə

Maliyyə

AİB Özbəkistan üzrə portfeli 2 dəfə artırıb

02 may 2010 18:55 (UTC +04:00)

«APA-Economics»in Daşkəndə ezam olunmuş əməkdaşının məlumatına görə, tədbirdə çıxış edən Özbəkistanın maliyyə naziri Rüstəm Əzimov qeyd edib ki, AİB-lə Özbəkistan hökuməti arasında ümumi həcmi 1.2 mlrd. ABŞ dolları təşkil edən 4 kredit sazişi imzalanıb: “Bundan öncə AİB-in Özbəkistan üzrə portfeli 1,2 mlrd. dollar təşkil edirdi. İmzalanan kreditlər sazişləri isə portfelin iki dəfə artdığından xəbər verir”.

Tədbirdə Özbəkistanla AİB arasında əlaqələrin inkişafından danışan AİB-in prezidenti Haruhiko Kuroda isə qeyd edib ki, bank tərəfindən Özbəkistana ayrılan vəsait əsasən nəqliyyat, kənd təsərrüfatı, təbii resursların hasilatı və mikromaliyyə sahələrinə ayrılacaq.

H. Kuroda həmçinin qeyd edib ki, 2009-cu ildə Özbəkistanda ümumidaxili məhsul (ÜDM) 8,1% artıb: “Bizim proqnozlara əsasən, bu ilin sonuna Özbəkistanda ÜDM-nin artım tempi 8,9%, 2011-ci ildə isə 9%-dən artıq təşkil edəcək”.

Qeyd edək ki, Özbəkistanın investisiya imkanları təqdimatında Azərbaycanın maliyyə naziri Samir Şərifovun başçılıq etdiyi nümayəndə heyəti də iştirak edib.

Xatırladaq ki, mayın 1-də Daşkənddə AİB-in 43-cü illik toplantısı işə başlayıb. Toplantı zamanı dünya maliyyə bazarının hazırkı vəziyyəti, böhranın üzv ölkələrə mənfi təsiri və buna qarşı görülən tədbirlər, müxtəlif layihələrin həyata keçirilməsində Bankın Azərbaycana və digər dövlətlərə göstərdiyi dəstək, həmçinin əməkdaşlığın inkişaf perspektivləri müzakirə olunur.

İclas çərçivəsində S. Şərifovun H. Kuroda, bankın baş direktoru Xuan Miranda, ölkələr üzrə səsvermə qrupunun direktoru Stefen Sedvik və digər şəxslərlə görüşləri nəzərdə tutulub. Tədbir mayın 4-də başa çatacaq.
AİB 1966-cı ildə yaradılıb. Bankın baş qərargahı Manilada (Filippin) yerləşir. Azərbaycan Banka 22 dekabr 1999-cu ildə üzv qəbul olunub və ümumi səhm kapitalında 0,5 %-lik səhm zərfinə malikdir. Ümumilikdə isə 67 ölkə AİB-in üzvüdür. AİB-in aparıcı səhmdarları Yaponiya və ABŞ (ümumi səhm kapitalının 31,2%-i), Hindistan və Çin (12,8%), Avstraliya, Cənubi Koreya və Kanada (16%) və s. ölkələrdir.