Maliyyə

Ana səhifə

Maliyyə

«Gəncəbank»ın aktivləri son bir ildə 34% artıb

05 may 2010 06:25 (UTC +04:00)

Bakı. Elnur Hüseynquluyev – APA-Economics. Azərbaycanın «Gəncəbank» ASC-nin aktivlərinin həcmi 2010-cu ilin aprel ayının 1-nə 40,252 mln. manat təşkil edib ki, bu da ötən ilin aprelin 1-nə olan göstəricidən 33,6% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 14,4% artaraq 3,388 mln. manat, o cümlədən əhalinin əmanətləri 11% artaraq 2,901 mln. manat, kredit portfeli 38,7% artaraq 29,146 mln. manat, o cümlədən istehlak kreditlərinin həcmi 32,3% azalaraq 3,623 mln. manat olub. Eyni zamanda, bankın məcmu kapitalı 41,2% artaraq 16,794 mln. manata, o cümlədən nizamnamə kapitalı 50% artaraq 15 mln. manata çatıb.

Qeyd edək ki, ötən bir il ərzində bankın gəlirləri 25% azalaraq 904 min manat, xərcləri isə 31% artaraq 690 min manat olub. Nəticədə, bankın mənfəəti 68,4% azalaraq 214 min manat təşkil edib.

Bu müddət ərzində bankın müştərilərinin sayı 5,6% artaraq 2 363, o cümlədən fiziki şəxslərin sayı 6% artaraq 2 008, hüquqi şəxslərin sayı 3,8% artaraq 355 olub. Bankın işçilərinin sayı 1,4% artaraq 74 nəfərə, orta aylıq əmək haqqı isə 14% azalaraq 627 manata çatıb.

Xatırladaq ki, «Gəncəbank» ASC 1994-cü ildən fəaliyyət göstərir. Bankın ölkə üzrə 3 filialı, 6 bankomatı və 14 POS-terminalı mövcuddur.