Maliyyə

Ana səhifə

Maliyyə

Azərbaycanda bank aktivləri son bir ildə 37% artıb

05 may 2010 09:25 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının aktivləri 2010-cu ilin aprel ayının 1-nə 12 030,01 mln. manat təşkil edib ki, bu da 2009-cu ilin müvafiq dövrü ilə müqayisədə 3 215,05 mln. manat və ya 36,5% çoxdur. Azərbaycan Mərkəzi Bankından «APA-Economics»ə verilən məlumata görə, aktivlərin illik dinamikası ötən ilin birinci rübü ərzində 1 458,5 mln. manatlıq azalma, sonrakı dövrlərdə artım nümayiş etdirib:

Aktivlərin strukturuna gəldikdə, müştərilərə verilən kreditlərin həcmi aprelin 1-nə 8 004,9 mln. manat (xüsusi çəkisi 66,54%), müxbir hesablar 1 066,13 mln. manat (8,86%), investisiyaların həcmi 855,25 mln. manat (7,11%), nağd vəsaitlər 585,19 mln. manat (4,86%), maliyyə sektoruna verilmiş kredit və depozitlərin həcmi 538,11 mln. manat (4,47%), digər aktivlər isə 980,43 mln. manat (8,16%) təşkil edib.

Kommersiya banklarının passivlərinin 83,42%-i öhdəliklərin payına düşür. Beləliklə, bank öhdəliklərinin həcmi 10 035,26 mln. manat təşkil edib ki, bu da ötən ilin aprelin əvvəlindən 3 007,52 mln. manat və ya 42,8% çoxdur. Öhdəliklərin tərkibində 4 493,42 mln. manat depozitlər, 4 774,43 mln. manat maliyyə sektorundan alınmış kredit və depozitlər və 767,41 mln. manat digər öhdəliklərin payına düşür. Bankların məcmu kapitalı son bir ildə 207,53 mln. manat və ya 11,6% artaraq 2010-cu ilin aprelin 1-nə 1 994,75 mln. manata çatıb.