Maliyyə

Ana səhifə

Maliyyə

Bakıda İslam İnkişaf Bankı Müdirlər Şurasının illik toplantısı başlayıb

23 iyun 2010 08:22 (UTC +04:00)

Toplantıda Azərbaycanın iqtisadi inkişaf naziri Şahin Mustafayev çıxış edərək deyib ki, dünyada baş verən qlobal maliyyə böhranı üzv ölkələrin bəzilərinə təsir etsə də, əsasən bu amilə qarşı müqavimət göstərilib və dayanıqlılıq təmin edilib. Üzv ölkələrə daha səmərəli xidmət göstərmək üçün İBB islahatlar aparır, müəyyən tədbirlər həyata keçirir. Ş.Mustafayev Azərbaycanın iqtisadi göstəriciləri haqqında da məlumat verib. Onun sözlərinə görə, son illər Azərbaycanda 1800 məktəb tikilərək istifadəyə verilib. Dövlət büdcəsi 7 dəfə, əhalinin gəlirləri 6,7 dəfə artıb, son beş ildə 840 min iş yeri açılıb, yoxsulluğun səviyyəsi 49%-dən 11%-ə enib: «Əldə olunan nailiyyətlər nəticəsində iqtisadi böhranın fəsadları neytrallaşdırılıb».

Toplantıda İİB prezidenti Əhməd Məhəmməd Əli çıxış edərək Azərbaycanda urbanistik inkişafın şahidi olduğunu deyib. Onun sözlərinə görə, dünya iqtisadi böhranı Azərbaycanın inkişafına mane olmayıb: «Buna görə biz sizə, atanız Heydər Əliyevə borcluyuq. Siz də onun yolunu davam etdirdiyinizə görə minnətdarlığmızı bildiririk».

Ə. M. Əli deyib ki, İİB Azərbaycanda davamlı inkişaf mühitini nəzərə alaraq öz dəstəyini əsirgəməyəcək: «Biz bilirik ki, Azərbaycan işğaldan əziyyət çəkir. Böyük qaçqın ordusu var. İstəyirik ki, Azərbaycan torpaqları işğaldan azad olunsun. İstəyirik ki, Ermənistan işğal etdiyi torpaqları azad etsin və BMT-nin qəbul etdiyi qətnamələr yerinə yetirilsin».

Onun sözlərinə görə, İİB son illər ərzində 7,5 mlrd. dollar inkişafa vəsait yönəldib: «İstəyirik ki, yoxsul İslam ölkələrinin tələbatlarına daha çox diqqət yetirilsin. İqtisadi böhrandan əziyyət çəkən ölkələrə dəstək verilsin. Bu sahədə bizim bank da layihələr həyata keçirəcək. Azərbaycanla İİB arasında 1992-ci ildən əməkdaşlıq əlaqələri mövcuddur və indiyə kimi Azərbaycanla 528 mln. dollar vəsaitlə 28 layihədə iştirak edib».

Ə. M. Əli Qırğızıstanda baş verən proseslərdən narahatlıq keçirdiklərini və orada yaranmış çətinliklərin aradan qaldırılması üçün bu ölkəyə dəstək verilməsinin zərurliyini vurğulayıb.

Tədbir davam edir.