Maliyyə

Ana səhifə

Maliyyə

Dünyada milyonçuların sayı qlobal böhrana qədərki həddə qayıdıb

23 iyun 2010 09:52 (UTC +04:00)

“APA-Economics”in “Bloomberg”ə istinadən məlumatına görə, bu barədə “Capgemini” şirkətlər qrupu və “Merrill Lynch” investisiya bankı tərəfindən hazırlanmış “World Wealth Report” adlı illik hesabatda bildirilir.

Tədqiqat müəllifləri dünyada sərvəti 1 mln. ABŞ dollarını ötən 10 mln. nəfərə yaxın adamın yaşadığını qeyd edirlər. 2008-ci ildə bu rəqəm 8,6 mln. nəfər təşkil edib. Qiymətləndirmə zamanı investisiya xarakterli aktivlər, o cümlədən hesablardakı vəsaitlər və qiymətli kağızlar nəzərə alınıb. Əsas yaşayış yerinin, eləcə də şəxsi kolleksiyaların dəyəri nəzərə alınmayıb.

Dünyanın varlı adamlarının məcmu sərvətinin həcmi ötən il 2008-ci illə müqayisədə 18,9% artaraq 39 trln. ABŞ dollarına çatıb. Hesabata əsasən, ən çox milyonçu ABŞ-da yaşayır - 2,87 mln. nəfər. İkinci yerdə Yaponiya (1,65 mln. nəfər), üçüncü yerdə Almaniya (861,5 min nəfər) gəlir. Ümumilikdə bu üç ölkədə dünya milyonçularının 53,7%-i yaşayır.

Regionlar üzrə bölgüyə gəldikdə, ən çox milyonçu şimali Amerikada yaşayır - 3,1 mln. nəfər. Burada milyonçuların sayı ötən il 2008-ci illə müqayisədə 175 artıb. İkinci yerdə Asiya-Sakit okean regionu gəlir - 3 mln. nəfər. Bu regionda artım isə 26% olub.

Qeyd edək ki, “World Wealth Report” illik hesabatına əsasən 2008-ci il dünyanın varlı adamları üçün çox uğursuz il olub. O zaman milyonçuların sayı 15% azalaraq 10 mln. nəfərdən 8,6 mln. nəfərə, onların məcmu sərvəti isə 40,7 trln. dollardan 32,8 trln. dollara düşüb.