Maliyyə

Ana səhifə

Maliyyə

İranın iqtisadiyyat və maliyyə naziri: Ümid edirəm ki, iranlı iş adamlarının Azərbaycanda investisiya yatırımları daha da inkişaf edəcək - MÜSAHİBƏ

İranın iqtisadiyyat və maliyyə naziri: Ümid edirəm ki, iranlı iş adamlarının Azərbaycanda investisiya yatırımları daha da inkişaf edəcək - <font color=red>MÜSAHİBƏ</font>

24 iyun 2010 08:19 (UTC +04:00)

- İran və Azərbaycan arasında iqtisadi və maliyyə sahəsində əlaqələr hansı səviyyədədir?

- Hazırda İran və Azərbaycan arasında münasibətlər istər iqtisadi, istərsə də investisiya qoyuluşu sahəsində yüksək səviyyədədir. Bizim Azərbaycanla mədəniyyət, din və dil baxımından tarixi əlaqələrimiz hər sahədə, o cümlədən iqtisadi sahədə münasibətlərin genişlənməsinə geniş imkanlar yaradır. Hesab edirəm ki, iki ölkənin prezidentlərinin səyləri nəticəsində əlaqələrimiz inkişaf edir.

- İranla Azərbaycan arasında ticarət dövriyyəsinin həcmi hansı səviyyədədir və bunun artırılması mümkündürmü?

- Son illər ərzində iki ölkə arasında ticarət mübadiləsi 500 mln. dollar həcmində olub. Bununla yanaşı, iranlı iş adamlarının Azərbaycanda xüsusilə tikinti sahəsinə sərmayə yatırımlarının şahidiyik. Amma etiraf etməliyəm ki, bu işlər bizim nəzərdə tutduğumuz həcmdən qat-qat aşağıdır. Əlbəttə, İran və Azərbaycan arasında ölkə rəhbərliyi, eləcə də siyasi cəhətdən əlaqələr çox yaxşıdır. İki ölkənin yüksək rütbəli şəxslərinin qarşılıqlı səfərləri göstərir ki, siyasi cəhətdən münasibətlər yüksək olduğu kimi, iqtisadi cəhətdən də əlaqələr həmin səviyyədə gözlənildiyindən də artıq olmalıdır. Düşünürəm ki, gələcəkdə iki ölkə arasında iqtisadi sahədə 10 mlrd. dollar həcmində ticarət mübadiləsini qarşımıza məqsəd qoysaq, bunun bütün sahələrdə əməkdaşlığa köməyi olacaq.

- Azərbaycanda İslam bankçılığının inkişaf etdirilməsində İran tərəfinin buna nə kimi dəstəyi ola bilər?

- İran İslam bankçılığı sahəsində bütün imkanlarını dost, qardaş Azərbaycan dövlətinin və xalqının ixtiyarına verməyə hazırdır. Bu, ölkələrimiz arasında iqtisadi sahə başda olmaqla bütün sahələrdə olan əməkdaşlığımıza müsbət təsir edəcək. Bizim digər İslam ölkələri ilə də belə əməkdaşlığımız var.

- İranla Azərbaycan arasında müştərək azad ticarət zonasının yaradılmasına münasibətiniz necədir?

- Azərbaycan Respublikası ilə İranın Şərqi Azərbaycan vilayəti arasında iki ölkənin sərhədində müştərək azad ticarət zonasının yaradılması haqda bir razılaşma var. Bunun reallaşdırılmasının tərəfdarıyıq və bu sahədə işlər görülür. Sadəcə, iş icraçıları bu sahədə bir az tələsməlidir. Əlbəttə, biz ticarət əməliyatlarının asanlaşdırılması və sadələşdirilməsi üçün sərhəddə müştərək nəzərət-buraxılış məntəqəsinin təsis edilməsinin tərəfdarıyıq. Həmin binada həm Azərbaycanın, həm də İranın gömrük işçiləri fəaliyyət göstərməli, İrandan Azərbaycana gətirilən, eləcə də Azərbaycandan İrana aparılan məhsullar elə oradaca öz qanuni həllini tapmalıdır. Yəni, iranlı tacir Azərbaycana gətirdiyi malın sənədini müştərək binada İran gömrük işçisinə təqdim etdikdə, həmin sənəd Azərbaycan gömrük işçisinin də masası üstünə gəlir və iş öz qanuni həllini elə oradaca tapır. Azərbaycanlı iş adamı üçün də bu proses eyni asanlıqla baş verir. Bu, ikitərəfli ticarət və iqtisadi əməkdaşlığın genişlənməsi və asanlaşmasına yardım edər. Bizim bəzi ölkələrlə bu cür təcrübəmiz mövcuddur. Təcrübə göstərir ki, bu, iqtisadi əməkdaşlığın inkişafına olduqca müsbət təkan verir.

- İran investorları Azərbaycanda daha çox hansı sahəyə investisiya yatırmaqda maraqlıdır?

- İranlılar Azərbaycanda ən çox tikinti, istehsalat və kənd təsərrüfatına yatırım etməkdə maraqlıdır. Bu sahədə müəyyən işlər gedir və ümid edirəm ki, iki ölkənin rəhbərliyinin səyləri nəticəsində gələcəkdə iranlı iş adamlarının Azərbaycanda investisiya qoyuluşu sahəsində işlər daha da inkişaf edəcək.