Maliyyə

Ana səhifə

Maliyyə

Azərbaycan bank sistemində durğunluq yaranıb

25 iyun 2010 14:18 (UTC +04:00)

«APA-Economics»in məlumatına görə, bunun əsas səbəbi maliyyə və iqtisadi böhranın kəskinləşməsindən sonra banklar tərəfindən aktivlərin yerləşdirilməsinə daha ehtiyatla yanaşması, kifayət qədər ehtiyatların toplanması və risklərin idarə edilməsinə daha çox diqqət yetirməsi ilə bağlıdır.

Bunu bank sistemi üzrə son göstəricilər də təsdiq edir. Belə ki, cari ilin mayın 1-nə bankların məcmu aktivlərinin tərkib hissəsi olan nağd vəsaitlərin həcmi 673,1 mln. manata bərabər olub ki, bu da ilin ilk 4 ayı ərzində 44,4%-lik artım deməkdir. Müqayisə üçün qeyd edək ki, bütövlükdə ötən il ərzində nağd vəsaitlərin həcmi yalnız 1,2% artıb.

Eyni zamanda, bankların kreditlərin verilməsi sahəsində fəallığı azalıb. Belə ki, bankların müştərilə verdiyi kreditlərin ümumi həcmi həmin tarixə 8,122 mlrd. manat təşkil edib ki, bu da ilin əvvəlindən cəmi 2% çoxdur. Bundan əlavə, banklar tərəfindən maliyyə sektoruna verilmiş kredit və depozitlər portfeli 532,8 mln. manata bərabər olub ki, bu da ilin əvvəlindən 11%-lik azalma deməkdir. Müqayisə üçün qeyd edək ki, ötən il müştərilərə verilən kreditlərin həcmi 16,8%, maliyyə sektoruna yönəldilən faizli aktivlərin həcmi isə 44,5% artıb.

Tam dolğun təsəvvürün əldə olunması üçün həmçinin ötən ilin ilk 4 ayının göstəricilərilə müqayisə aparmaq zəruridir. Belə ki, ötən ilin yanvar-aprel ayları ərzində nağd vəsaitlərin həcmi 15,3% azalıb, müştərilərə verilmiş kreditlərin həcmi 13,6% azalıb, maliyyə sektoruna verilmiş kredit və depozitlərin həcmi 19,3% artıb. Müqayisədə belə bir nəticəyə gəlmək olar ki, bu bank göstəricilərinin cari ilin yanvar-aprel ayları ərzində dinamikası ötən ilin həmin dövründən kəskin fərqlənir. Burada qeyd olanmıdır ki, ötən ilin I rübü ərzində dünya maliyyə böhranının təsiri altında Azərbaycan bank sistemində bütün aktiv əməliyyatları üzrə göstəricilərdə azalma müşahidə olunub ki, sonradan bu azalma artımla əvəz olunub. Lakin göründüyü kimi, kreditlər üzrə bu ilin yanvar-aprel ayları ərzində artım tempi ötən ilin ümumi artım tempindən xeyli geri qalır. Bankların sərəncamında olan nağd vəsaitlərin dinamikası isə tam dəyişib ki, bu da bankların ehtiyatlanması və yarana biləcək problemlərlə bağlı ehtimalların yüksək səviyyədə olduğunu göstərir.