Maliyyə

Ana səhifə

Maliyyə

«Paşa Bank» ötən il ərzində xalis mənfəətini 50% artırıb

30 iyun 2010 10:00 (UTC +04:00)

Bakı. Elnur Hüseynquluyev – APA-Economics. Bu gün Bakıda Azərbaycanın «Paşa Bank» ASC-nin 2009-cu il üçün maliyyə fəaliyyətinin nəticələrinə, həmçinin bankın gələcək planlarına dair mətbuat konfransı keçirilib.

«APA-Economics»in məlumatına görə, tədbirdə bankın İdarə Heyətinin sədri Fərid Axundov bildirib ki, dünyada baş verən maliyyə böhranına baxmayaraq, böhranın Azərbaycana ciddi təsiri olmayıb. Bu müddət ərzində ölkənin iqtisadi inkişafı nəticəsində əldə edilən göstəricilər əhəmiyyətli dərəcədə artıb. Dövlətin, o cümləıdən Azərbaycan Mərkəzi Bankının apardığı siyasət nəticəsində inflyasiya səviyyəsi aşağı olub, banklardakı likvidlik artıb.

Tədbirdə daha sonra bankın Maliyyə menecmenti Departamentinin direktoru Şahin Məmmədov «Paşa Bank»ın 2009-cu ilin sonuna olan maliyyə göstəriciləri haqqında ətraflı məlumat verib. Ş.Məmmədovun sözlərinə görə, 2009-cu ilin sonuna bankın məcmu aktivləri 306,433 mln. manata çatıb ki, bu da 2008-ci ilin yeknu ilə müqayisədə 55% çoxdur. «Aktivlərin diversifikasiyasına istiqamətlənmiş strateji qərarın nəticəsi olaraq, bank müştərilərə göstərilən xidmətlərin balansının saxlanmasına nail olunub. Həmçinin, bu müddət ərzində bankın kredit portfeli 2,6 dəfə artaraq 122,080 mln. manata çatıb. Eyni zamanda, 2008-ci il ilə müqayisədə bankın xalis mənfəəti 2009-cu il ərzində 49% artaraq 16,059 mln. manata çatıb ki, bu da bankın kapitallaşmasını artırmağa imkan verib. Ötən ilin nəticələrinə görə, «Paşa Bank» Azərbaycanın beş ən mənfəətli bankları sırasına daxil olub».

Ş.Məmmədov qeyd edib ki, hesabat ilində bankın qeyri-faiz gəlirləri 2,3 dəfə artaraq 2,639 mln. manat təşkil etdiyi halda, faiz gəlirləri 24,384 mln. manat təşkil edib. Beynəlxalq maliyyə institutları ilə aparılmış danışıqlar nəticəsində bank korporativ müştərilərinə daha böyük miqdarda kommersiya xarakterli maliyyə xidmətləri göstərə bilib. Belə ki, bir il ərzində ticarətin maliyyələşdirilməsi portfeli təxminən 2,6 dəfə artaraq 25,614 mln. manatadək yüksəlib.

Bank bu müddət ərzində 126,570 mln. manat məcmu kapital ilə iri kommersiya banklarından biri kimi öz mövqeyini qoruyub saxlayıb.

«Ümumiyyətlə, 2009-cu il bank üçün beynəlxalq biznesə cəlb edilmiş korporativ müştərilərə bir çox sahələrdə xidmət göstərən və bankın mövqeyinin korporativ qurum kimi möhkәmlәnmәsinә yönələn birinci strateji mərhələnin başa çatması ili kimi əlamətdardır. Başa çatmış müddət ərzində bank, ölçülərindən asılı olmayaraq, şəffaf və sabit rəhbərliyi olan şirkət üçün güclü partnyor kimi bankçılıq bazarında öz yerini tutub», - deyə departament başçısı vurğulayıb.

Xatırladaq ki, «Paşa Holding» Şirkətlər Qrupuna daxil olan «Paşa Bank» 2007-ci ilin noyabr ayından fəaliyyət göstərir. Cari ilin aprel ayının 1-nə bankın aktivlərinin həcmi 333,289 mln. manat, depozit portfeli 166,326 mln. manat, kredit portfeli 140,174 mln. manat, məcmu kapitalı 128,283 mln. manat təşkil edib.