Maliyyə

Ana səhifə

Maliyyə

Azərbaycan WOCCU-nun Las-Veqasda keçiriləcək növbəti konfransında iştirak edəcək

30 iyun 2010 14:29 (UTC +04:00)

Bakı. Elnur Hüseynquluyev – APA-Economics. Azərbaycan Kredit İttifaqları Assosiasiyası (AKİA) cari ilin iyul ayının 14-17-də Ümumdünya Kredit İttifaqları Şurasının (WOCCU - World Council of Credit Unions) Las-Veqasda (ABŞ) keçiriləcək növbəti konfransında iştirak edəcək. Bu barədə «APA-Economics»ə açıqlamasında AKİA-nın İdarə Heyətinin sədri Elçin Bağırov məlumat verib.

E.Bağırovun sözlərinə görə, toplantıda beynəlxalq quruma üzv olan kredit ittifaqlarının üzvlük məsələsi, 2009-cu il ərzində ittifaqlar tərəfindən görülmüş işlərin hesabatı, həmçinin üzv ölkələrdə kredit ittifaqları ilə bağlı qanunvercilik bazasında aparılan təkmilləşdirmə işləri, eyni zamanda yoxsulluğun azadılması ilə bağlı həyata keçirilən layihələrin nəticəsi müzakirə ediləcək.

Qeyd edək ki, WOCCU-nun ötən il Barselonada (İspaniya) keçirilən iclasından fərqli olaraq, növbəti iclasda E.Bağırovun müvafiq mövzu üzrə çıxışı nəzərdə tutulmayıb.

Xatırladaq ki, Azərbaycan 100 ölkənin üzv olduğu WOCCU təşkilatına 2009-cu ilin mart ayında üzv olub. Üzv təşkilatlar tərəfindən quruma illik 5 min ABŞ dolları məbləğində üzvlük haqqı ödənilir. AKİA üçün üzvlük haqqı güzəştli şərtlərlə müəyyənləşdirilib və birinci il üçün 500 dollar təşyin olunub, sonrakı mərhələdə isə hər il 500 dollar artırılaraq 5 min dollara çatdırılacaq.

WOCCU 1971-ci ildə təsis edilib və hazırda quruma üzv olan 49 mindən çox kredit ittifaqının ümumilikdə 177 mln. səhmdarı var. Bu kredit ittifaqlarının aktivlərinin ümumi həcmi 1,181 trln. dollara bərabərdir. WOCCU-nun mənzil qərargahı Medisonda (Viskonsin ştatı, ABŞ) yerləşir.

Xatırladaq ki, AKİA 2003-cü ildən fəaliyyət göstərir. Azərbaycandakı 79 kredit ittifaqından 47-si qurumun üzvüdür. Assosiasiyanın üzvü olan kredit ittifaqlarının 35-i kənd təsərrüfatının kreditləşməsində iştirak edir. Quruma kredit ittifaqları tərəfindən ödənilən rüblük üzvlük haqqı 100 manat, yeni qəbul edilən ittifaqlar üçün isə 30 manat təşkil edir.