Maliyyə

Ana səhifə

Maliyyə

Naxçıvanda yeni mühasibat uçotu standartlarının tətbiqi ilə bağlı təlim və seminarlar keçiriləcək

06 iyul 2010 09:51 (UTC +04:00)

Bakı. Nicat Mustafayev - APA-Economics. “Mühasibat uçotu haqqında” Azərbaycan Respublikasının Qanununa uyğun olaraq beynəlxalq və milli mühasibat uçotu standartlarına keçidlə əlaqədar Naxçıvanda Azərbaycan Maliyyə Nazirliyinin təşkilatçılığı ilə növbəti təlimlər keçirilib.

Maliyyə Nazirliyindən «APA-Economics»ə verilən məlumata görə, ilkin mərhələdə təlimlər Naxçıvanın büdcə təşkilatlarında işləyən mühasiblər, maliyyəçilər və iqtisadçılar üçün nəzərdə tutulub.

Təlimlərin təşkili zamanı Naxçıvanın Maliyyə Nazirliyinin fəal əməkdaşlığı sayəsində muxtar respublika ərazisində fəaliyyət göstərən büdcə təşkilatlarının nümayəndələrindən ibarət qruplar təşkil edilib.

Öncə Azərbaycan Maliyyə Nazirliyinin nümayəndələri ilə Naxçıvan MR Maliyyə Nazirliyinin rəhbər şəxsləri arasında görüş keçirilib, Muxtar Respublikada mühasibat uçotu standartlarının tətbiqi ilə bağlı mövcud vəziyyət öyrənilmiş və qarşıda duran vacib məsələlər müzakirə edilib.

Daha sonra təşkil edilmiş qruplar üzrə təlimlərə başlanılıb və tədbir çərçivəsində mühasibat uçotu sahəsində baş vermiş yeniliklər, qəbul edilmiş yeni qanunvericilik aktları, eləcə də Büdcə Təşkilatları üçün Milli Mühasibat Uçotu Standartlarının konsepsiyası haqqında və həmin standartlara əsasən uçotun ənənəvi mühasibat uçotundan fərqli xüsusiyyətləri barədə ətraflı məlumat verilib.

Bununla yanaşı, tədbirdə uçotun avtomatlaşdırılmasının üstünlüklərindən və bu sahədə görülmüş işlərdən, həmçinin «Mühasibat uçotu – büdcə» proqram təminatının tətbiqi və hesabatlılığın onlayn sistemə keçidi ilə əlaqədar görüləcək işlər barədə məlumat verilib.

Keçirilən təlimlər praktiki misallar üzərində qurulub və əsas etibarilə büdcə təşkilatları üçün milli mühasibat uçotu standartlarına uyğun olaraq maliyyə hesabatlarının tərtib edilməsi üçün müxbirləşmələr əsasında uçotun qurulması üzrə məsələləri əhatə edib. Hər bir təlimin növbəti günündə isə təlim iştirakçılarının hesabatlılıqla bağlı praktiki sualları cavablandırılmış və hesabatların tərtib edilməsi zamanı onların qarşılaşdıqları problemlərin həlli göstərilib.

Növbəti mərhələdə yeni standartların tətbiqi ilə bağlı Naxçıvanda həm nəzəri, həm də praktiki aspektləri əhatə etməklə kommersiya, büdcə və digər qeyri-kommersiya təşkilatları üçün yeni mühasibat uçotu standartlarının tətbiqi ilə bağlı nəzəri təlimlər, büdcə təşkilatları üçün maliyyə hesabatlarının tərtib edilməsi üzrə praktiki seminarlar, kommersiya və digər qeyri-kommersiya təşkilatları üçün maliyyə hesabatların tərtib edilməsi üzrə praktiki seminarlar və maliyyə hesabatlarının onlayn rejimdə qəbulu ilə əlaqədar proqram təminatının tətbiqi üzrə təlimlərin keçirilməsi nəzərdə tutulub.