Maliyyə

Ana səhifə

Maliyyə

Azərbaycanın uzaq xarici ölkələrlə ticarət dövriyyəsi 40% artıb

21 dekabr 2010 14:30 (UTC +04:00)

Bakı. Əli Əhmədov – APA-Economics. Cari ilin yanvar-noyabr aylarında Azərbaycanın uzaq xarici ölkələrlə (MDB-dən başqa) xarici ticarət dövriyyəsi üzrə müsbət saldo 13 670,5 mln. ABŞ dolları təşkil edib. Bu, ötən ilin analoji dövrünə nisbətən 73,10% çoxdur.

Dövlət Gömrük Komitəsindən «APA-Economics»ə verilən məlumata görə, hesabat dövründə Azərbaycan uzaq xarici ölkələrlə 21 505,826 mln. dollar həcmində ticarət əməliyyatı aparıb. Ötən ilin ilk 11 ayına nisbətən bu il ticarət əməliyyatlarının ümumi həcmi 39,57% artıb.

Ümumilikdə, bu ilin yanvar-noyabr aylarında Azərbaycanın ümumi xarici ticarət dövriyyəsinin 85,62%-i uzaq xarici ölkələrlə aparılan ticarət əməliyyatlarının payına düşüb.

Bu müddət ərzində Azərbaycandan uzaq xarici ölkələrə ixrac 17 588,168 mln. dollar, idxal 3 917,658 mln. dollar təşkil edib. Keçən ilin eyni dövrünə nisbətən ixrac 50,93%, idxal isə 4,32% artıb.

Uzaq xarici ölkələrə ixracın əsas hissəsini – 97,99%-ni mineral yanacaq, neft və onların emal məhsulları, bitumlu minerallar təşkil edib. İxrac əməliyyatlarının 0,41%-i təbii və süni yetişdirilmiş mirvari, qiymətli və ya azqiymətli daşlar, qiymətli metallar, qiymətli metala tutulmuş adi metallar və onlardan olan məmulatlar, bijuteriya, sikkələr, 0,39%-i qara metallar, 0,30%-i polimer materiallar və onlardan hazırlanan məmulatlar, 0,14%-i şəkər və şəkərdən hazırlanan qənnadı məmulatının payına düşüb.

Bu müddətdə uzaq xarici ölkələrdən Azərbaycana idxalın 24,54%-ni avadanlıqlar və mexaniki qurğular, 9,76%-ni quru nəqliyyat vasitələri, 9,04%-ni elektrik maşınları və avadanlıqları, onların hissələri, 8,32%-ni qara metallardan hazırlanan məmulatlar, 4,04%-ni isə şəkər və şəkərdən hazırlanan qənnadı məmulatları təşkil edib.