Maliyyə

Ana səhifə

Maliyyə

Azərbaycanın MDB ölkələri ilə ticarət dövriyyəsinin müsbət saldosu 2 dəfə artıb

21 dekabr 2010 14:59 (UTC +04:00)

Bakı. Əli Əhmədov – APA-Economics. Cari ilin yanvar-noyabr aylarında Azərbaycanın MDB ölkələri ilə xarici ticarət dövriyyəsinin müsbət saldosu 21 628,8 min ABŞ dolları təşkil edib. Ötən ilin analoji dövründə MDB ölkələri ilə ticarətdə olan 180 576,1 min dollarlıq mənfi saldo tamamilə aradan qalxıb.

Dövlət Gömrük Komitəsindən «APA-Economics»ə verilən məlumata görə, hesabat dövründə Azərbaycan MDB ölkələrilə 3 609 310,3 mln. dollar həcmində ticarət əməliyyatı aparıb. Ötən ilin ilk 11 ayına nisbətən bu il MDB ölkələrilə ticarət əməliyyatlarının ümumi həcmi 12,57% artıb. Ümumilikdə, Azərbaycanın ümumi xarici ticarət dövriyyəsinin yalnız 14,38%-i MDB ölkələrlə aparılan əməliyyatların payına düşüb.

Bu müddət ərzində Azərbaycdan MDB ölkələrinə ixrac 1 815 470,0 mln. dollar, idxal 1 793,841 mln. dollar təşkil edib. Keçən ilin ilk 11 ayına nisbətən MDB ölkələrinə ixracın həcmi 20,00%, idxal isə 5,93% artıb.

Təhlil olunan dövrü ərzində MDB ölkələrinə ixracın əsas hissəsini – 58,81%-ni mineral yanacaq, neft və onların emal məhsulları, bitumlu minerallar, 9,63%-ni gəmilər, qayıqlar və digər üzən vasitələr, 8,28%-ni heyvan və ya bitki mənşəli piylər və yağlar, 5,97%-i şəkər və şəkərdən hazırlanan qənnadı məmulatı, 4,43%-i tərəvəz təşkil edib.

Bu müddətdə MDB ölkələrindən Azərbaycana idxalın 14,95%-i dənli bitkilər, 11,05%-i avadanlıqlar və mexaniki qurğular, 9,54%-i qara metallardan məmulatlar, 9,33%-i quru nəqliyyat vasitələri, 7,05%-i isə qara metalların payına düşüb.