Maliyyə

Ana səhifə

Maliyyə

Azərbaycan və Birləşmiş Ərəb Əmirlikləri “Gömrük işlərində əməkdaşlıq və qarşılıqlı yardım haqqında” sazişi paraflayıb

23 dekabr 2010 08:52 (UTC +04:00)

Bakı. Viktoriya Dementyeva - APA-Economics. Azərbaycan Dövlət Gömrük Komitəsi (DGK) və Birləşmiş Ərəb Əmirliklərinin (BƏƏ) Federal Gömrük Administrasiyası “Gömrük işlərində əməkdaşlıq və qarşılıqlı yardım haqqında” sazişin yekun variantını paraflayıblar.

“APA-Economics”in “WAM” agentliyinə istinadən xəbərinə görə, paraflama DGK-nın gömrük nəzarəti departamentinin rəisi Şahin Bağırovun başçılıq etdiyi Azərbaycan nümayəndə heyətinin BƏƏ-yə dekabrın 19-22-də baş tutan səfəri zamanı həyata keçirilib.

Saziş tərəflərin daxili ratifikasiya prosedurlarını başa çatdırmasından sonra imzalanacaq. “Sənəd iki ölkə arasında təcrübə mübadiləsinə, iqtisadi əməkdaşlığın və ticarətin inkişafına gətirib çıxaracaq” - deyə BƏƏ-nin Federal Gömrük Administrasiyasının beynəlxalq əlaqələr üzrə direktoru Suud Salem əl-Əqrubi bildirib.

Onun sözlərinə görə, bu saziş gömrük pozuntularının azalması, gömrük rüsumlarının dəqiq hesabının aparılması, gömrük işlərində məlumatlandırmanın səviyyəsinin artması və birgə təlim kurslarının yaradılması ilə də nəticələnəcək.