Maliyyə

Ana səhifə

Maliyyə

Azərbaycan banklarının effektivliyi normadan aşağıdır

24 dekabr 2010 10:41 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının aktiv əməliyyatlar üzrə effektivliyi dünya praktikasında norma kimi qəbul edilmiş göstəricilərdən aşağıdır. «APA-Economics»in hesablamalarına görə, 2010-cu il noyabr ayının 1-nə bankların ümumi faiz gəlirinin məcmu aktivlərə nisbəti 6,8% təşkil edib. Belə ki, bankların məcmu faiz gəlirləri 870,4 mln. manat, məcmu aktivləri isə 12 768 mln. manata bərabər olub.

Eyni zamanda, bu göstəricini adətən ilin yekunları üzrə hesablanır və bu halda ilin yekunlarına görə onun bir qədər artacağını gözləmək olar, çünki gəlirlərin aylıq artım tempi aktivlərin artım tempini müəyyən dərəcədə üstələyir. Məsələn, oktyabrın 1-nə gəlirlərin aktivlərə olan nisbəti 6,3%-ə bərabər olub. Qeyd edək ki, nisbi göstərici və əmsallar üzrə dünya praktikasında bankların effektivliyini və aktiv əməliyyatların səmərəliyini göstərən faiz gəlirlərinin aktivlərə nisbətinin məqbul səviyyəsi 10-18%-dir.

Ümumiyyətlə, Azərbaycanda faiz gəlirləri üzrə mənfi tendensiya müşahidə olunur. Belə ki, noyabrın 1-nə bankların faiz gəlirlərinin illik artım tempi 0,95% təşkil edib, lakin ötən ilin eyni dövrü üzrə illik artım tempi 7,1%-ə bərabər olub. Bunun əsas səbəbi kimi Azərbaycanda kommersiya banklarının kreditləşmə prosesinə ehtiyatla yanaşması nəticəsində faiz gəlirlərinin azalması ilə bağlıdır.