Maliyyə

Ana səhifə

Maliyyə

Azərbaycan bankları yanvarda zərərlə işləyib

01 mart 2011 09:55 (UTC +04:00)

Azərbaycan Mərkəzi Bankından «APA-Economics»ə verilən məlumatına görə, 2010-cu ilin yanvarında bank sistemi üzrə 15,68 mln. manat həcmində vergi ödənilənədək mənfəət əldə olunub.

Bu ilin yanvarın yekununda aktivlər üzrə xüsusi ehtiyatlara ayırmalar (24,46 mln. manat) nəzərə alınmaqla, bankların cəmi mənfəəti 21,81 mln. manata bərabər olub ki, bu da ötən ilin müvafiq dövrünə nisbətən 1,8 dəfə azdır.

Hesabat ayında bankların faiz gəlirləri 91,67 mln. manat, faiz xərcləri 48,66 mln. manat təşkil edib və nəticədə xalis faiz mənfəəti 43,02 mln. manata bərabər olub. Eyni zamanda, bankların qeyri-faiz gəlirləri 16,28 mln. manat, qeyri-faiz xərcləri isə 36,49 mln. manat təşkil edib ki, bunun nəticəsində qeyri-faiz əməliyyatları üzrə 20,21 mln. manata bərabər zərər yaranıb.

Qeyd edək ki, 2010-cu ilin yanvarı ilə müqayisədə faiz mənfəəti 11,9% azalıb, qeyri-faiz zərəri isə 97,8% artıb. O cümlədən, faiz gəlirləri 0,3% artdığı halda, faiz xərcləri 14,4% artıb. Qeyri-faiz əməliyyatlarında isə gəlirlər 20,4% azalıb, xərclər isə 18,9% artıb.

Azərbaycan bank sistemi üzrə aylıq zərərin yaranması çox nadir hallarda baş verir. Qeyd edək ki, ötən il ərzində bank sistemi üzrə mənfəətin kəskin azalması müşahidə olunsa da, yekunda mənfəət yaranırdı. Bu ilin yanvarında isə bankların gəlirləri xərclər və aktivlər üzrə xüsusi ehtiyatlara ayırmaları ödəyə bilməyib. Bunun əsas səbəbi iqtisadi böhranla əlaqədar banklar tərəfindən kredit fəaliyyətinin məhdudlaşdırılması və kreditlərlə birbaşa bağlı olmayan əməliyyatları inkişaf etdirməməsi ilə bağlıdır. Nəticədə, faiz gəlirləri və faiz xərcləri üzrə artım templəri tam fərqli, qeyri-faiz əməliyyatları üzrə isə nəticələr daha da mənfi olub.