Maliyyə

Ana səhifə

Maliyyə

«Rabitəbank»ın 25% səhminin iki starteji investora satışı prosesi bu ay tam başa çatdırılacaq

02 mart 2011 10:22 (UTC +04:00)

Bakı. Nicat Mustafayev – APA-Economics. Azərbaycanın «Rabitəbank» ASC-nin səhmdarları sırasına Avropa Yenidənqurma və İnkişaf Bankı (EBRD) və Beynəlxalq Maliyyə Korporasiyasının (IFC) daxil olması prosesi 2011-ci ilin mart ayı ərzində tam başa çatacaq. «APA-Economics»in məlumatına görə, bunu bankın İdarə Heyətinin sədr müavini Elçin Qədimov bildirib.

E.Qədimovun sözlərinə görə, mart ayında bu proses çərçivəsində nəzərdə tutulmuş bankın səhmlərinin əlavə emissiyası həyata keçiriləcək, satılan iştirak payı ödəniləcək və iki yeni səhmdara səhm zərfləri təqdim olunacaq.

Qeyd edək ki, EBRD və IFC hər biri bankın səhmlərinin 12,5%-lik zərfinə sahib olacaq. Bununla əlaqədar, bankın nizamnamə kapitalının əlavə səhm emissiyası vasitəsilə 3,5 mln. manat artırılması nəzərdə tutulub. Səhmlərin alqı-satqı prosesi tam yekunlaşdıqdan sonra bankın nizamnamə kapitalı 35% artaraq 13,5 mln. manata çatacaq. Səhmlərin qalan hissəsi yerli hüquqi və fiziki şəxslərə məxsusdur.

Xatırladaq ki, «Rabitəbank» ASC 1993-cü ildən fəaliyyət göstərir. Bankın aktivlərinin həcmi 2011-ci ilin yanvarın 1-nə 121,821 mln. manat, kredit portfeli 85,448 mln. manat, o cümlədən istehlak kreditlərinin həcmi 23,737 mln. manat, depozit portfeli 102,840 mln. manat, o cümlədən əhalinin əmanətləri 60,315 mln. manat təşkil edib. Ötən il ərzində bankın ümumi gəlirləri 14,542 mln. manat, xərcləri 15,519 mln. manat, nəticədə yaranmış bankın zərəri 0,977 mln. manata bərabər olub.