Maliyyə

Ana səhifə

Maliyyə

Azərbaycan pulların yuyulmasına qarşı mübarizə üzrə Latviyanın qiymətləndirilməsində iştirak edəcək

02 mart 2011 13:56 (UTC +04:00)

Bakı. Vahab Rzayev - APA-Economics. Azərbaycan Latviyanın cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə (PL/TMM) sahəsində milli sisteminin Avropa Şurasının MONEYVAL Komitəsi tərəfindən həyata keçiriləcək IV raund qiymətləndirilməsində iştirak edən dörd ölkədən biri təyin edilib.

Azərbaycan Mərkəzi Bankı yanında Maliyyə Monitorinqi Xidmətindən “APA-Economics”ə verilən məlumatına görə, Latviyanın PL/TMM sahəsində IV raund qiymətləndirilməsi 2011-ci ilin mayın 9–14-də baş tutacaq.

Qeyd edək ki, ölkələrin PL/TMM sahəsində milli sisteminin qiymətləndirilməsi üçün MONEYVAL üzvü olan ölkələrdən üç ekspert, FATF üzvü olan ölkələrdən isə bir ekspert cəlb edilir. Beləliklə, Azərbaycan ilk dəfə olaraq digər dövlətin PL/TMM sisteminin hüquqi və institusional aspektlərinin qiymətləndirilməsində iştirak edəcək.

Xatırladaq ki, 1997-ci ildən etibarən fəaliyyət göstərən Avropa Şurasının MONEYVAL Komitəsi öz üzvlərinin PL/TMM sahəsində milli sistemlərinin IV raund qiymətləndirilməsinə 2010-cu ildən başlayıb. Sloveniya və Macarıstan üzrə bu prosedurlar artıq yekunlaşıb, Azərbaycanın IV raund qiymətləndirilməsi isə MONEYVAL-ın 2013-cü il İş Planına salınıb.

Qeyd edək ki, əgər II və III raund qiymətləndirmədə hüquqi və institusional bazanın FATF-ın 40+9 Tövsiyəsinə uyğunluğu müəyyən edilirsə, IV raund formatında PL/TMM sisteminin effektivliyi və qanunvericiliyin praktiki tətbiqi meyarları üzrə qiymətləndirmə aparılır.