Maliyyə

Ana səhifə

Maliyyə

«Paşa Bank»ın ötən ilki fəaliyyəti ilə bağlı audit rəyi açıqlanıb

07 mart 2011 11:30 (UTC +04:00)

Bakı. Elnur Hüseynquluyev – APA-Economics. «Ernst & Young» beynəlxalq audit şirkəti Azərbaycanın «Paşa Bank» ASC-nin 2010-cu ildəki fəaliyyətinin yekunları ilə bağlı hesabat üzrə rəyini açıqlayıb.

Bankın baş ofisindən «APA-Economics»ə verilən məlumata görə, audit hesabatına əsasən, ötən il ərzində bankın aktivləri 67% artaraq 512,304 mln. manat təşkil edib. Bunun 37%-i müştərilərə verilmiş kreditlər, 31%-i qiymətli kağızlar portfeli, 26%-i nağd vəsaitlər və buna bərabər tutulan vəsaitlər, 5%-i banklararası kreditlər və digər aktivlərin payına düşür. Məcmu kredit portfeli 2009-cu ilə nisbətən 1,6 dəfə artaraq 196,081 mln. manat təşkil edib, portfel üzrə effektiv ehtiyat dərəcəsi isə 4,2% olub. Bankın ümumi portfelindəki qeyri-işlək kreditlərin payı 0,6% olub, əvvəlki il bu göstərici 0,3% təşkil edib. Ötən il bankın əməliyyat gəlirləri 34% artaraq 30,334 mln. manata çatıb.

Hesabatda həmçinin bildirilir ki, 2010-cu il ərzində əldə olunmuş xalis mənfəət 2009-cu illə müqayisədə 14% azalaraq 13,871 mln. manat təşkil edib. Bunun səbəbi bazarda kreditləşmə üzrə orta faiz dərəcələrinin azalması, bankda banklararası və müştərilərin maliyyələşdirilməsi üzrə ehtiyat fondunun qiymətləndirilməsi metodologiyasına dəyişiklərin edilməsi ilə bağlıdır. Bankın faiz gəlirləri 33,842 mln. manat, qeyri-faiz gəlirləri 5,258 mln. manat, işçilərlə əlaqədar olan xərclər isə 5,680 mln. manat olub. Postmaliyyələşdirmə də daxil olmaqla sənədli əməliyyatların ümumi həcmi 37,116 mln. manat təşkil edib.

Sənəddə səhmdar kapitalı üzrə gəlirlilik əmsalı (ROE) 18,2% (2009-cu ildə - 16,9%), aktivlər üzrə gəlirlilik əmsalı (ROA) 4,1% (2009-cu ildə - 5,5%), likvidlik əmsalı 171% (2009-cu ildə - 77%), kapitalın adekvatlığı əmsalı 62% (2009-cu ildə - 77%) olub.

Xatırladaq ki, «Paşa Holding» Şirkətlər Qrupuna daxil olan «Paşa Bank» 2007-ci ilin noyabr ayından fəaliyyət göstərir. Hazırda bankın 6 bankomatı və 56 POS-terminalı mövcuddur.