Maliyyə

Ana səhifə

Maliyyə

«Günay Sığorta» şirkətinin daxilolmaları son bir ildə 40% azalıb

10 mart 2011 07:09 (UTC +04:00)

Bakı. Elnur Hüseynquluyev – APA-Economics. Azərbaycanın «Günay Sığorta» şirkətinin 2011-ci ilin yanvar-fevral aylarında topladığı sığorta haqlarının həcmi 104,517 min manat təşkil edib ki, bu da ötən ilin müvafiq dövrünün göstəricisi ilə müqayisədə 39% azdır.

Şirkətdən «APA-Economics»ə verilən məlumata görə, hesabat dövründə şirkətin sığorta riskləri üzrə ödənişlərinin həcmi 40% azalaraq 23,895 min manat təşkil edib.

Sığorta haqlarının strukturunda ən çox vəsait «Əmlakın yanğından sığortası» (55,044 min manat), «Avtonəqliyyat vasitələrinin sığortası» (28,801 min manat) və «Mülki məsuliyyətin sığortası» (13,547 min manat) növləri üzrə toplanılıb. Bu növlərin məcmu daxilolmalarda payı isə müvafiq olaraq 53%, 28% və 13% təşkil edib.

Ödənişlərə gəldikdə isə, 19,025 min manatla (məcmu ödənişdə payı 80%) «Avtonəqliyyat vasitələrinin sığortası» növü liderlik edir. Sonrakı yerdə isə 2,480 min manatla (10,4%) «Tibbi sığorta» və 1,760 min manatla (7,4%) «Avtonəqliyyat vasitəsi sahiblərinin mülki məsuliyyətinin icbari sığortası» növü qərarlaşıb.

Xatırladaq ki, «Günay Sığorta» şirkəti 1992-ci ildən fəaliyyət göstərir. Şirkət əvvəllər xarici kapitallı yerli hüquqi şəxs formasında fəaliyyət göstərib. Belə ki, şirkətin nizamnamə kapitalının 51%-ni yerli, 49%-ni xarici kapital təşkil edib. Lakin nizamnamə kapitalında edilən dəyişikliyə əsasən, şirkət 100%-li yerli şirkətə çevrilib. Hazırda şirkətin səhmdarları sırasına «Günay Bank» (34,62%) və iki yerli fiziki şəxs (65,38%) daxildir. Hazırda şirkət 2 icbari və 18 könüllü sığorta növü üzrə xidmət göstərir.