Maliyyə

Ana səhifə

Maliyyə

Azərbaycan ötən il 317 mln. dollar həcmində xarici dövlət borcu qaytarıb

10 mart 2011 13:40 (UTC +04:00)

Bakı. Nicat Mustafayev – APA-Economics. Ötən il ərzində Azərbaycan xarici maliyyə-kredit təşkilatlarından cəlb etdiyi kreditlərin 735,1 mln. ABŞ dollarını istifadə edib.

Nazirlər Kabinetindən «APA-Economics»ə verilən məlumata görə, ümumiyətlə, 2011-ci ilin yanvarın 1-nə ölkənin xarici dövlət borcu 3 857,3 mln. dollar təşkil edib ki, bu da 2010-cu ilin əvvəli ilə müqayisədə 12,7% çoxdur: «İnvestisiya layihələri üçün kreditlərin cəlb edilməsi məqsədilə imzalanmış sazişlər üzrə ayrılan vəsaitlərin məbləği 8 563,4 mln. dollar, bu vəsaitlərdən istifadə edilmiş kreditin həcmi isə 4 310,9 mln. dollara bərabər olub».

Ümumən, 2011-ci ilin yanvarın 1-nə xarici dövlət borcunun strukturunda elektrik enerjisi sektorunun inkişafı və bərpası (36,25%), yol tikintisi və nəqliyyat infrastrukturunun bərpası (31,5%), iqtisadi islahatlar (7,84%), kənd təsərrüfatı (3,49%), su təchizatı və meliorasiya (8,52%), sosial sahələr (4,31%), neft, qaz və kimya (5,5%) və digər sahələr (2,59%) yer alıb.

Bununla yanaşı, 2011-ci ilin əvvəlinə istifadə edilən kreditlərin tərkibində imtiyazlı kreditlərin həcmi 1 984,6 mln. dollar təşkil edib.

Bundan başqa, 2010-cu ildə 249,6 mln. dollar məbləğində əsas borc qaytarılıb, xarici dövlət borcuna xidmətlə əlaqədar 66,9 mln. dollar məbləğində faiz ödənişi həyata keçirilib: «Hazırda xidmət olunan kreditlərdən 2011-ci ilin yanvarın 1-nə xarici valyutaların məzənnəsinə müvafiq olaraq qaytarılan kreditlərin ümumi məbləği təxminən 811,5 mln. dollar ekvivalentində olub».

Qeyd edək ki, imzalanmış ümumi sazişlər üzrə ayrılan kreditlərin cari ilin yanvarın 1-nə ÜDM-ə nisbəti 21,5%-ə, istifadə edilmiş və dövlət borcu hesab edilən kreditlərin ÜDM-ə nisbəti isə 9,3%-ə bərabər olub.