Maliyyə

Ana səhifə

Maliyyə

Ötən il Azərbaycanda satınalma müsabiqələri hesabına 94 mln. manata qənaət edilib

14 mart 2011 08:33 (UTC +04:00)

Bakı. Əli Əhmədov – APA-Economics. Azərbaycanın dövlət müəssisə və təşkilatları 2010-cu ildə müsabiqə yolu ilə 10 944 satınalma həyata keçirib. Bu barədə «APA-Economics»ə Satınalmalar üzrə Dövlət Agentliyindən məlumat verilib.

Agentliyin məlumatına görə, yekun protokollarına əsasən, ötən il bağlanan satınalma müqavilələrinin ümumi dəyəri 1 275,704 mln. manat təşkil edib. Bu satınalma predmetinin ehtimal olunan qiymətinin (1 369,7 mln. manat) 93,996 mln. manatına və ya 6,86%-nə qənaət edilməsi deməkdir. Qənaətin böyük hissəsi – 92,56%-i və ya 87 mln. manatı tender üsulu ilə keçirilən satınalmalarda əldə olunub. Kotirovka sorğusu üsulu ilə keçirilən satınalmalarda 6,989 mln. manata qənaət edilib.

Qeyd edək ki, say etibarı ilə satınalmaların əksəriyyəti (9 762 satınalma) kotirovka sorğusu üsulu ilə (ümumi sayın 89,2%-i) keçirilsə də, onların ümumi məbləği 152 mln. manat və ya ümumi dövlət satınalmalarının cəmi 11,92%-ni təşkil edib.

Dövlət büdcəsinin vəsaiti hesabına aparılan 10 004 satınalmala müsabiqəsində 56,994 mln. manat və ya tender predmetinin ehtimal olunan qiymətinin 4,99%-nə qənaət edilib. Nəticədə, bağlanan müqavilələrin ümumi məbləği 1 084,766 mln. manat təşkil edib. Bundan tender üsulu ilə keçirilmiş satınalmalarda qənaət 50,65 mln. manat və ya 5,08%, kotirovka sorğusu üsulu ilə keçirilən satınalmalarda isə 6,3 mln. və ya 4,4% təşkil edib.

Nazirlik, komitə, dövlət müəssisə və təşkilatları üzrə dövlət büdcəsinin vəsaiti hesabına keçirilmiş 6 162 satınalma müsabiqəsində bağlanan müqavilələrin qiyməti 771, 31 mln. manat təşkil edib, bu zaman tender predmetinin ehtimal olunan qiymətindən 49,3 mln. manata və ya 6,01%-ə qənaət edilib. Respublikanın şəhər və rayonlarının (Bakı şəhəri daxil olmaqla) təhsil, səhiyyə, kommunal və digər təşkilatlar tərəfindən dövlət büdcəsinin vəsaiti hesabına keçirilmiş 3 842 satınalma müsabiqələrində 7,686 mln. manata və ya 2,39%-ə qənaət edilib.

Ötən il beynəlxalq maliyyə-kredit qurumları tərəfindən ayrılmış kredit və qrantlar hesabına 23 satınalma üzrə müsabiqə keçirilib. Bu müsabiqələrdə vəsaitin 5,138 mln. manatına və ya 5,65%-ə qənaət olunub. Dövlət müəssisə və təşkilatlarının xüsusi vəsaitləri hesabına keçirilən 917 satınalma müsabiqəsində 31,86 mln. manata və ya 23,25%-ə qənaət edilib.

Keçən ilin göstəricilərindən məlum olur ki, satınalmalar üzrə keçirilən müsabiqələr sayəsində ən çox qənaət (faiz nisbətində) Dövlət Neft Fondunda (58,33%), Azərbaycan İnvestisiya Şirkəti (52,31%), «Azərenerji» ASC (41,27%) üzrə qeydə alınıb. Dövlət Xəzər Dəniz Gəmiçiliyi və «Azərbaycan Hava Yolları» QSC-nin keçirdiyi müsabiqələrdə isə qənaət qeydə alınmayıb.