Maliyyə

Ana səhifə

Maliyyə

Vahid Novruzov: «Azərbaycanda könüllü audit sahəsinin inkişafı istiqamətində işlər davam etdirilməlidir»

22 aprel 2011 09:31 (UTC +04:00)

Bakı. Vahab Rzayev – APA-Economics. Azərbaycanda təsərrüfat subyektləri tərəfindən müstəqil kənar auditə və düzgün rəyin olmasına marağın olmaması və artmaması fonunda audit bazarınin inkişafı çətinləşir. «APA-Economics»in məlumatına görə, bunu Azərbaycan Auditorlar Palatasının sədri Vahid Novruzov bu gün keçirdiyi mətbuat konfransında bildirib.

Son zamanlar icbari audit sahəsində, auditorların keyfiyyət nəzarətinin gücləndirilməsi sahəsində tədbirlərin aparılması və qanunvericilikdə icbari auditdən keçməyən təsərrüfat subyektlərinə qarşı əhəmiyyətli cərimələrin tətbiqinin əks etdirildiyini qeyd edən V.Novruzov eyni zamanda bildirib ki, ölkədə könüllü audit sahəsinin inkişafı istiqamətində işlər davam etdirilməlidir. «Müqayisə üçün bildirim ki, Almaniyada könüllü audit yerli audit bazarının təxminən 70-80%-ni təşkil edir», - deyə V.Novruzov vurğulayıb. Onun sözlərinə görə, Azərbaycanda artıq yeni düşüncəli sahibkarlar təbəqəsi formalaşır, auditorların məsuliyyəti artırılır və audit sahəsində sövdələşməli rəylərin verilməsi ilə mübarizə aparılır ki, bu da sahibkarlar arasında düzgün, reallığı əks etdirən audit rəylərin əldə edilməsinə marağın artmasına xidmət edir.

V.Novruzov həmçinin bildirib ki, qanunvericiliklə icbari auditdən keçməli olan qurumların (səhmdar cəmiyyətləri, banklar, sığorta şirkətləri və s.) yalnız 9-10%-i bu tələbi yerinə yetirir və «Audit xidməti haqqında» qanuna və İnzibati Xətalar Məcəlləsinə son dəyişiklər bu sahədə nəzarətin gücləndirilməsinə xidmət edəcək. Eyni zamanda, birbaşa Auditorlar Palatası tərəfindən auditorların məsuliyyəti və keyfiyyət nəzarəti sahəsində ciddi tədbirlər həyata keçirilir.

V.Novruzovun sözlərinə görə, hazırda Azərbaycanda 300 fiziki və 100 hüquqi şəxs auditor xidmətinin göstərilməsi lisenziyasına malikdir.