Maliyyə

Ana səhifə

Maliyyə

Azərbaycan-Ukrayna Hökumətlərarası Komissiyanın iclasında uzunmüddətli birgə layihələr müzakirə olunub

22 aprel 2011 10:36 (UTC +04:00)

Bakı. Viktoriya Dementyeva - APA-Economics. Azərbaycan-Ukrayna İqtisadi əməkdaşlıq üzrə Hökumətlərarası Komissiyanın Bakıda keçirilən iclasında energetika, aviakosmik, nəqliyyat, kənd təsərrüfatı sahələrində əməkdaşlığı gücləndirmək və uzunmüddətli birgə layihələrə başlamaq qərara alınıb.

“APA-Economics”in xəbərinə görə, iclasda Azərbaycan neftinin Ukraynanın neft emalı müəssisələrinə çatdırılması sahəsində əməkdaşlıq perspektivləri, Azərbaycan Dövlət Neft Şirkətinin (ARDNŞ) Ukrayna ərazisində yanacaqdoldurma məntəqələri şəbəkəsinə investisiyalarının artırılması məsələləri müzakirə olunub.

Hazırda ARDNŞ-ın Ukraynada 15 yanacaqdoldurma məntəqəsi və Odessada neft bazası var. Həmçinin “SOCAR” brendi ilə 7 yanacaqdoldurma məntəqəsi və 2 baza fəaliyyət göstərir.

Hökumətlərarası Komissiyanın iclasında ARDNŞ və Ukrayna Milli Elmlər Akademiyası arasında energetika sahəsində elmi-texniki əməkdaşlıq məsələsi də müzakirə olunub. Azərbaycan Rabitə və İnformasiya Texnologiyaları Nazirliyi ilə Ukrayna Milli Kosmik Agentliyi arasında əməkdaşlığa dair təkliflərin hazırlanması haqqında razılaşma əldə olunub.

Bundan başqa, iclas iştirakçıları bir sıra beynəlxalq nəqliyyat layihələrində əməkdaşlıq, o cümlədən Azərbaycanın Ukrayna, Litva və Belarus arasında imzalanmış “Baltik dənizi - Qara dəniz istiqamətində yükdaşımaların inkişaf etdirilməsi haqqında” sazişə qoşulması məsələlərini müzakirə ediblər.