Maliyyə

Ana səhifə

Maliyyə

Qızılın qiyməti 49 dollar/qram həddinə yaxınlaşıb

25 aprel 2011 13:33 (UTC +04:00)

Bu gün qızılın unsiyasının qiyməti növbəti psixoloji həddə – 1520 dollar/unsiyaya yaxınlaşıb.

«APA-Economics»in məlumatına görə, hazırda qızılın unsiyası rekord qiymətə - 1518,6 dollara və ya qramı 48,81 dollara satılır. Bundan əvvəlki qiymət rekordu (1515 dollar/unsiya) aprelin 22-də qeydə alınıb.

Qızılın bu dəfəki bahalaşmasının səbəbi dolların məzənnəsinin zəifləməsi, eləcə də neft və ərzağın bahalaşması nəticəsində dünyada inflyasiyanın güclənməsi təhlükəsidir. Dünyada getdikcə artmaqda olan inflyasiya, Avropa ölkələrinin borc problemi və uzun illərdən bəri ilk dəfə olaraq ABŞ-ın kredit reytinqi üzrə proqnozun «neqativ»ə endirilməsi investorları narahat edir. Bütün bunlar nəticəsində kapital yüksək gəlirli, amma riskli sahələrdən çıxarılaraq ənənəvi etibarlı sahəyə – qızıla yatırılır.

Paralel olaraq gümüşün unsiyasının qiyməti 50 dollara yaxınlaşır. Qeyd edək ki, sonuncu dəfə gümüş bu qiymətə 1980-ci ilin yanvarında satılıb (50,35 dollar/unsiya). Hazırda isə gümüşün qiyməti 49,82 dollardır.

Bununla yanaşı ekspertlər bildirir ki, qızılın qiyməti bu həddə qalmaya da bilər – səbəbi investorların artıq həddən çox qızıl almasıdır. «Commodity Intelligence Ltd.» şirkətinin mütəxəssisləri hesab edirlər ki, artıq aprelin sonunda qızılın qiyməti 1,4 min dollara və ya qramı 45 dollara düşə bilər.

Ümumilikdə, qızılın qiyməti son 1 ayda 86 dollar və ya 6,04%, son 1 ildə isə 359,1 dollar və ya 31,02% bahalaşıb.