Maliyyə

Ana səhifə

Maliyyə

“Bank of Baku” Məlumat Mərkəzinə daxil olan telefon zənglərinin xərclərini özü ödəyəcək

28 aprel 2011 09:22 (UTC +04:00)

Bakı. Vahab Rzayev - APA-Economics. Azərbaycanın “Bank of Baku” ASC müştəriləri üçün təqdim etdiyi xidmətlərin səviyyəsini artırması çərçivəsində cari il aprel ayından etibarən “145” Məlumat Mərkəzinə regionlardan daxil olan şəhərlərarası zənglərin rabitə xərcləri artıq müştərilər tərəfindən deyil, “Bank of Baku” tərəfindən ödəniləcək.

Bankdan “APA-Economics”ə verilən məlumata görə, “145” Məlumat Mərkəzi informasiya tutumuna, proqram təminatına və texniki imkanlarına görə “Bank of Baku”nun məhsul və xidmətləri barədə məlumatlandırılmasına xidmət edir.

Həftənin bütün günləri 24 saat ərzində şəhər və mobil telefonlarından 145 nömrəsini yığıb Məlumat Mərkəzinə qoşulmaqla “Bank of Baku” ilə bağlı müxtəlif mövzularda avtomatlaşdırılmış məlumatlar əldə etmək mümkündür. Həmçinin Məlumat Mərkəzi layihəsi çərçivəsində avtomatlaşdırılmış məlumatlardan əlavə operatora qoşulmaqla bank məhsulları, şərtləri, kampaniyalar və s. haqqında ətraflı məlumat əldə etmək mümkündür.

Qeyd edək ki, 2010-cu ilin avqust ayında “Bank of Baku” müştərilərin vaxtına qənaət etmək məqsədilə “Telefon Bankçılıq - 145” növbəsiz ödənişlər xəttini açıb. Bu xidmət vasitəsilə müştərilər banka gəlmədən ölkənin istənilən yerindən, istənilən vaxt, istənilən telefonla kredit ödənişlərini həyata keçirə və hesabları barədə məlumat ala bilərlər. Bunun üçün isə sadəcə istənilən telefon (mobil və ya şəhər), “Bank of Baku”nun təqdim etdiyi müştəri kodu (müştəri kodu kreditin rəsmiləşdirməsi və ya ödənişi zamanı bankın eksperti tərəfindən müştəriyə verilir) və istənilən plastik kart sahibi olmaq kifayətdir. Ödəniş həyata keçiriləndən sonra müştəriyə ödənişin icrası haqqında müvafiq SMS göndərilir. Xidmət haqqında əlavə məlumat http://www.bankofbaku.com/az/phone-payment.html ünvanında yerləşdirilib.

Ümumulikdə “145” Məlumat mərkəzində Bankın ən son yenilikləri və kampaniyaları, əmanətlər, ipoteka kreditləri, istehlak kreditləri, plastik kartlar, yol çekləri, təcili pul köçürmələri və s. məhsul və xidmətlər barədə ətraflı məlumatlar (layihələrin şərtləri, tariflər və s.), valyuta məzənnələri, Bankın filial və xidmət məntəqələrinin ünvanları, telefon və faks nömrələri, bankomatların ünvanları, Bankın ödəniş rekvizitləri və s. məlumatları əldə etmək mümkündür.

Bununla yanaşı, bankın fəaliyyəti, xidmətlərin səviyyəsi və ya bankın məhsulları barədə təklif və ya iradları olanlar üçün də Məlumat mərkəzində xüsusi bölmə yaradılıb. Bu bölmədə zəng edən şəxs özü barədə qısa məlumat verdikdən sonra irad və təkliflərini bildirə bilər. Məlumat mərkəzinin xüsusi işçi qrupu mütəmadi olaraq daxil olan zənglərin, xüsusilə də təklif və iradların təhlili ilə məşğuldur.

Qeyd edək ki, ay ərzində “145” Məlumat Mərkəzinə 50 000 – 70 000 müraciət daxil olur, o cümlədən 700 – 1 000 müraciət regionların payına düşür. “Bank of Baku”nun fəaliyyəti haqqında daha ətraflı məlumatı bankın “145” Məlumat mərkəzi vasitəsilə, www.bankofbaku.com veb-saytında, həmin saytda fəaliyyət göstərən “Onlayn-məsləhətçi” xidmətinə müraciət edərək və ya wap.bankofbaku.com vasitəsilə əldə etmək olar.