Maliyyə

Ana səhifə

Maliyyə

Azərbaycanda bank kreditləşməsi kəskin azalıb

02 may 2011 09:39 (UTC +04:00)

Azərbaycan Mərkəzi Bankından «APA-Economics»ə verilən məlumata görə, ölkədə verilən kreditlərin ümumi həcmi aprelin 1-nə 8,366 mlrd. manat təşkil edib ki, bu da martın əvvəlinə nisbətən 786,8 mln. manat və ya 8,6% azdır. Ötən ilin eyni dövrü ilə müqayisdə isə kredit portfelinin həcmi 119,2 mln. manat və ya 1,4% azalıb.

Kredit portfelinin kəskin azalmasının səbəbi bəzi sahələrin kreditləşməsinin aşağı düşməsi ilə bağlıdır. Belə ki, martda energetika, kimya və təbii sərvətlər sektoruna verilən kreditlərin həcmi təqribən 3 dəfə azalaraq 979,7 mln. manatdan 301,2 mln. manata düşüb. Bu sahənin ümumi kredit portfelində xüsusi çəkisi 10,7%-dən 3,6%-ə düşüb.

Sənaye və inşaat sektoruna verilən kreditlərin həcmi 29,5% azalaraq 685,8 mln. manatdan 483,3 manata enib. Bu kreditlərin ümumi kredit portfelində payı isə 7,5%-dən 5,8%-ə düşüb.

Kənd təsərrüfatı və emal sahəsinə ayrılan kreditlərin həcmi 1,56% azalaraq 439,8 mln. manatdan 432,9 mln. manata düşüb. Amma bu sahənin ümumi kredit portfelində payı 4,8%-dən 5,2%-ə yüksəlib.

Nəqliyyat və rabitə sektoruna verilən kreditlərin həcmi demək olar ki, dəyişməyib - 448,5 mln. manatdan 448,4 mln manata enib. Əvəzində, bu kreditlərin xüsusi çəkisi 4,9%-dən 5,4%-ə qalxıb.

Martda ən yüksək artım tempi ticarət və xidmət sektoruna verilən kreditlər üzrə müşahidə olunub. Belə ki, bu sahənin kreditləşməsi 2,144 mlrd. manatdan 2,184 mlrd. manata, kredit portfelində payı isə 23,4%-dən 26,1%-ə qalxıb.

İnşaat və əmlak sektoruna verilən kreditlərin həcmi 647,6 mln. manatdan 652,6 mln. manatadək (0,8%) artıb, xüsusi çəkisi isə 7,1%-dən 7,8%-ə yüksəlib.

Mart ayında istehlak kreditləşməsinin həcmi 0,5% artaraq 2,761 mlrd. manata qalxıb. Nəticədə, məcmu kredit portfelinin 1/3 hissəsi məhx bu növ kreditlərin payına düşüb.