Maliyyə

Ana səhifə

Maliyyə

Azərbaycan və Litvanın vergi orqanları arasında əməkdaşlıq sazişi imzalanıb

05 may 2011 13:35 (UTC +04:00)

Bakı. Əli Əhmədov - APA-Economics. Litva Respublikasının Maliyyə Nazirliyi yanında Dövlət Vergi Müfəttişliyinin rəhbəri Modestas Kaseliauskasın rəhbərlik etdiyi nümayəndə heyəti Azərbaycana səfərə gəlib.

“APA-Economics”in məlumatına görə, səfərdə məqsəd vergi tutma sahəsində iki ölkənin vergi administrasiyaları arasında ikitərəfli əməkdaşlığın müzakirəsi, qarşılıqlı təcrübə mübadiləsinin aparılmasıdır.

Vergi orqanlarının rəhbərlərinin görüşündə gələcək əməkdaşlığın inkişaf istiqamətləri, vergitutma sahəsində əməkdaşlığın intensivləşdirilməsi üçün hüquqi bazanın genişləndirilməsi məsələləri müzakirə edilib.

Qonaqlar Xüsusi Rejimli Vergi Xidməti Departamentinin, “bir pəncərə” sisteminin, Vergilər Nazirliyinin telefon-məlumat xidmətinin fəaliyyəti ilə tanış olublar. Vergilər Nazirliyində Litva nümayəndə heyəti üçün Azərbaycanın vergi sistemi barədə təqdimat keçirilib.

Səfər çərçivəsində Azərbaycan Vergilər Nazirliyi ilə Litva Maliyyə Nazirliyi yanında Dövlət Vergi Müfəttişliyi arasında texniki əməkdaşlıq haqqında Saziş imzalanıb. Sənədi vergilər naziri Fazil Məmmədov və Litvanın Dövlət Vergi Müfəttişliyinin rəhbəri Modestas Kaseliauskas imzalayıb.

Bu sazişin imzalanması iki ölkə arasında əməkdaşlığın genişləndirilməsi, eləcə də Azərbaycan-Litva Hökumətlərarası Komissiyanın fəaliyyətinin səmərəliliyinin artırılması, eləcə də vergitutma sahəsində ölkəmizin beynəlxalq əlaqələrinin inkişaf etdirilməsi baxımından mühüm əhəmiyyətə malikdir.

Avropa İttifaqının üzvü olan Litva tərəfi ilə geniş təcrübə mübadiləsinin aparılması milli vergi qanunvericiliyinin və vergi inzibatçılığının təkmilləşdirilməsi baxımından xüsusilə faydalı hesab edilir. Bundan başqa, sazişin imzalanması beynəlxalq vergidən yayınma halları ilə mübarizə sahəsində Azərbaycan və Litvanın vergi orqanları arasında əməkdaşlığın intensivləşdirilməsinə də kömək edəcək.