Maliyyə

Ana səhifə

Maliyyə

Arif Vəliyev: «Azərbaycanda ətin bahalaşması süni xarakter daşıyır»

10 may 2011 09:18 (UTC +04:00)

«APA-Economics»in xəbərinə görə, bu barədə jurnalistlərə açıqlamasında Dövlət Statistika Komitəsinin sədri (DSK) Arif Vəliyev bildirib.

Onun sözlərinə görə, inflyasiyanın olub-olmayacağı maaş və pensiyaların nə qədər artırılacağından asılıdır: «Dəqiq məbləğ bəlli olandan sonra konkret fikir söyləmək olar».

DSK sədri qeyd edib ki, yay aylarında ölkədə ərzaq-tərəvəz mallarının ucuzlaşması gözlənilir: «Payızda isə mövsümə uyğun olaraq müəyyən bahalaşma istisna deyil. Son vaxtlar ət və digər ərzaq məhsullarının qiymətində müşahidə olunan bahalaşma süni xarakter daşıyır. Çünki biz bu məhsulları özümüz istehsal edirik, idxal etmirik».

Komitə rəhbəri aprel ayında Azərbaycanda deflyasiya qeydə alındığını vurğulayıb: «Yay aylarında adətən tikinti materialları bahalaşır. Güman edirəm ki, bu il də belə olacaq. Qışda isə tikinti azaldığından ucuzlaşma baş verir».

A.Vəliyev deyib ki, bu il yoxsulluq səviyyəsi istehlak səbətinə görə götürülüb: «Bu məbləğ 98 manatdır. İlin axırına müəyyən qədər inflyasiya olsa, məbləğ bir qədər də artacaq».