Maliyyə

Ana səhifə

Maliyyə

Azərbaycan və Latviya Hökumətlərarası Komissiyasının iclası keçirilir

11 may 2011 13:18 (UTC +04:00)

Bakı. Əli Əhmədov - APA-Economics. Bu gün Latviyanın paytaxtı Riqada Azərbaycan-Latviya iqtisadi, elmi-texniki və mədəni əməkdaşlıq üzrə Hökumətlərarası Komissiyanın 4-cü iclası keçirilir.

«APA-Economics»in məlumatına görə, 11-13 may tarixlərində davam edəcək iclasda iki ölkə arasında iqtisadi əlaqələrin hazırkı vəziyyəti, Avropa İttifaqı-Azərbaycan, xüsusilə Şərq Tərəfdaşlığı çərçivəsində əməkdaşlığı və Hökumətlərarası Komissiyanın 3-cü iclasının Protokolunda əks olunmuş müddəaların icra vəziyyəti müzakirə ediləcək.

Komissiyanın Latviya tərəfdən həmsədri nəqliyyat naziri Uldis Auqulis, Azərbaycan tərəfdən həmsədri isə nəqliyyat naziri Ziya Məmmədovdur.

İclasın protokolunda Latviya tərəfinin tranzit infrastrukturu imkanları (limanlar, dəmir yolları, avtomobil yolları və hava limanı), eləcə də yük və xüsusilə konteyner daşımaları ilə bağlı inkişaf planları haqqında məlumatlar öz əksini tapıb. Latviya tərəfi Azərbaycanı ixrac və idxal yüklərinin daşınması üçün Latviya limanları və bu ölkədən keçən tranzit dəhlizindən istifadəyə dəvət edib. Protokolda Azərbaycan tərəfinin də nəqliyyat sahəsində həyata keçirdiyi layihələr barədə məlumatlar göstərilib. Qeyd olunub ki, Azərbaycan ərazisindən keçən “Şimal-Cənub” və “Şərq-Qərb” (TRASECA) nəqliyyat dəhlizlərinin imkanlarından istifadə etməklə Latviyanın Yaxın Şərq və regionun digər istiqamətlərinə çıxışı təmin olunacaq.

Bundan başqa, Latviyanın “VRC Zasulauks” şirkəti “RīgasVagonbūvesrūpnīca” ASC şirkəti ilə birgə Azərbaycanın dəmiryol sisteminin inkişafı və qatarların əsaslı təmiri ilə bağlı öz xidmətlərini təklif edir. “VRC Zasulauks” ASC Baltik ölkələrində elektrik və dizel mühərrikli sərnişin qatarlarına xidmət, təmir və texniki qulluq sahəsində ən böyük şirkətlərdən biridir.

Qeyd edək ki, Azərbaycanda dəmir yolu sisteminin inkişaf etdirilməsi üzrə 2010-2014-cü illər Dövlət Proqramı çərçivəsində əsas məqsədlərindən mövcud qatar parkının müasirləşdirilməsidir. Bu qatar parkı vaxtilə “RīgasVagonbūvesrūpnīca” ASC tərəfindən yaradılıb.