Maliyyə

Ana səhifə

Maliyyə

Azərbaycan Beynəlxalq Bankı payızda İslam bankçılığının tətbiqinə başlayacaq

09 iyun 2011 11:24 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankı (ABB) İslam bankçılığının tətbiqi məqsədilə məsləhətçi şirkətin seçilməsinə dair elan etdiyi tenderin nəticələrini gələn həftə açıqlayacaq.

ABB-nin baş ofisindən «APA-Economics»ə verilən məlumata görə, tenderdə iştirak üçün müraciət etmiş 7 şirkətdən 4-nün («Ekvita & Islamic Finance Advisory Assurance Services», «Ernst & Young», «Baker McKenzie», «Pricewaterhouse Coopers», həmçinin «Salans», «Pinsent Masons» və KPMG şirkətlərinin konsorsiumu) təklifləri növbəti mərhələdə qiymətləndirmə üçün qəbul olunub.

ABB-dən bildirib ki, gələn həftə tenderin qalibi müəyyənləşəcək və onunla imzalanacaq müqavilənin tərtibatına başlanacaq.

Qeyd edək ki, ABB artıq iyulun 1-dən layihənin icrasına, payızda isə ölkə bazarında İslam bankçılığı xidmətlərinin tətbiqinə başlamaq niyyətindədir. Buna paralel olaraq müvafiq işçi qrupu tərəfindən İslam bankçılığı ilə bağlı qanun layihəsinin işlənməsi istiqamətində iş aparılacaq.

Xatırladaq ki, ABB-nin aktivlərinin həcmi 2011-ci ilin aprelin 1-nə 4 696,638 mln. manat, kredit portfeli 2 879,706 mln. manat, o cümlədən istehlak kreditlərinin həcmi 388,885 mln. manat, depozit portfeli 1 911,060 mln. manat, o cümlədən əhalinin əmanətləri 738,860 mln. manat təşkil edib. Bankın məcmu kapitalı 514,985 mln. manat, o cümlədən nizamnamə kapitalı 240 mln. manat olub. Bankın ümumi gəlirləri I rüb üzrə 84,591 mln. manat, xərcləri 77,983 mln. manat, mənfəəti 6,608 mln. manat təşkil edib.

Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur.