Maliyyə

Ana səhifə

Maliyyə

Azərbaycan bank sistemində problemlər dərinləşir

10 iyun 2011 08:25 (UTC +04:00)

Azərbaycan Mərkəzi Bankından «APA-Economics»ə verilən məlumatına görə, 2010-cu ilin yanvar-aprel ayları ilə müqayisədə əldə edilmiş mənfəət 26,07 mln. manat və ya 43,5% artıb.

Qeyd edək ki, yanvar-mart ayları ərzində bankların mənfəəti 38,31 mln. manat təşkil edib və bu, bankların aprel ayında zərərlə işlədiyini göstərir.

Yanvar-aprel aylarında bankların faiz gəlirləri 347,74 mln. manat, faiz xərcləri 188,20 mln. manat təşkil edib və nəticədə, xalis faiz mənfəəti 159,54 mln. manata bərabər olub. Eyni zamanda, bankların qeyri-faiz gəlirləri 87,05 mln. manat, qeyri-faiz xərcləri isə 164,38 mln. manat təşkil edib ki, bunun nəticəsində qeyri-faiz əməliyyatları üzrə 77,33 mln. manatlıq zərər yaranıb.

Qeyd edək ki, 2010-cu ilin yanvar-aprel ayları ilə müqayisədə faiz mənfəəti 2,5% azalıb, qeyri-faiz zərəri isə 41,2% artıb. O cümlədən, faiz gəlirləri 2,1% artdığı halda, faiz xərcləri 6,3% artıb. Qeyri-faiz əməliyyatları üzrə gəlirlər 7%, xərclər isə 20,8% artıb.

Əldə edilmiş nəticələr, o cümlədən bankların aprel ayını zərərlə başa vurması bank sistemində problemlərin kəskinləşməsindən xəbər verir. Belə ki, vəsaitlərin cəlb olunmasında heç bir problemi olmayan banklar vəsaitlərin yerləşdirilməsində ciddi çətinliklərlə üzləşir. Hazırda iqtisadiyyatda, o cümlədən kiçik və orta sahibkarlıqda dövriyyə vəsaitləri çatışmazlığı hiss olunur. Buna baxmayaraq, banklar kreditləşməyə ciddi ehtiyatla yanaşır. Bunun əsas səbəblərdən biri kimi vaxtı keçmiş kreditlərin xüsusi çəkisinin tədricən artması və bununla bağlı banklar tərəfindən ehtiyatlı kredit siyasəti həyat keçirməsidir. Bundan başqa, zərərin artması qeyri-faiz əməliyyatları üzrə xərclərin genişlənməsi ilə bağlıdır.