Maliyyə

Ana səhifə

Maliyyə

Azərbaycan Sığortaçılar Assosiasiyası gələn ildən yeni nizamnamə əsasında fəaliyyət göstərək

14 sentyabr 2011 14:48 (UTC +04:00)

Bakı. Elnur Hüseynquluyev – APA-Economics. Azərbaycan Sığortaçılar Assosiasiyasının (ASA) Müşahidə Şurası qurumun yeni nizamnaməsinin hazırlanmasına dair qərar qəbul edib. Bunu «APA-Economics»ə açıqlamasında ASA-nın icraçı direktoru Azər Əliyev bildirib.

A.Əliyevin sözlərinə görə, yeni nizamnamənin layihəsi hazırlandıqdan sonra sənəd tanışlıq üçün bütün sığorta şirkətlərinin rəhbərlərinə göndəriləcək: «Şirkətlərdən rəylər toplandıqdan sonra yeni nizamnamə layihəsi Müşahidə Şurası tərəfindən növbəti iclaslarda qəbul edilə bilər. Bu proses ilin sonadək davam edəcək, yəni 2012-ci ildən Assosiasiya fəaliyyətini yeni nizamnamə əsasında davam etdirəcək. Bütün bu işlərlə əlaqədar qurumun hüquq komitəsi məşğul olur».

A.Əliyev bildirib ki, yeni nizamnamədə sığorta şirkətləri üçün üzvlük haqqının artırılması məsələsi də əksini tapa bilər: «Lakin bütün bu kimi məsələlər ümumi müzakirələrdən sonra qəbul edilə bilər. Ümumilikdə, yeni hazırlanacaq nizamnamə mövcud nizamnamədən çox fərqlənəcək, bununla bağlı məlumat vermək hələ tezdir».

Xatırladaq ki, ASA 2006-cı ilin dekabrında təsis olunub. Hazırda 28 sığorta şirkəti qurumun üzvdür. Sığorta təşkilatlarının ödədiyi illik üzvlük haqqı isə 5 min manatdır.