Maliyyə

Ana səhifə

Maliyyə

Azərbaycan və Dünya Bankı arasında yeni kredit sazişi imzalanıb - VİDEO - FOTOSESSİYA

Azərbaycan və Dünya Bankı arasında yeni kredit sazişi imzalanıb - <font color=red>VİDEO</font> - <font color=red>FOTOSESSİYA</font>

22 sentyabr 2011 10:06 (UTC +04:00)

«APA-Economics»in məlumatına görə, sənədi Azərbaycan tərəfindən Qiymətli Kağızlar üzrə Dövlət Komitəsinin (QKDK) sədri Rüfət Aslanlı, DB tərəfindən isə Bankın ölkə üzrə meneceri Cozef Ouen imzalayıblar.

Tədbirdə çıxış edən QKDK sədri R.Aslanlı bildirib ki, hazırlanması təxminən 1,5 il davam edən bu layihənin məqsədi Azərbaycanın kapital bazarlarında səmərəli tənzimləyici çərçivə və infrastrukturun təmin edilməsi, maliyyələşmə və investisiya mexanizmləri kimi səhm və korporativ borc alətlərinin istifadəsinin genişləndirilməsi vasitəsi ilə iqtisadi artım və yüksək rifahı dəstəkləməkdən ibarətdir. Layihənin ümumi dəyəri 15,8 mln. ABŞ dolları təşkil edir ki, bunun 12 mln. dolları DB tərəfindən kredit, daha 1,6 mln. dolları İsveçrə İqtisadi Əməkdaşlıq Katibliyi (SECO) tərəfindən qrant şəklində ayrılacaq. Layihədə Azərbaycan hökumətinin payı isə 2,2 mln. dollar təşkil edir.

Qeyd edək ki, təqdim olunan kredit Beynəlxalq Yenidənqurma və İnkişaf Bankı (IBRD – DB Qrupunun üzvü) vəsaitləri hesabına maliyyələşdiriləcək. Kredit ilk 3 ili güzəştli olmaq şərti ilə 15 il müddətinə təqdim olunur.

R.Aslanlı xatırladıb ki, «Kapital bazarlarının müasirləşdirilməsi Layihəsi» Azərbaycan prezidentinin 2011-ci il mayın 16-da təsdiq etdiyi Qiymətli kağızlar bazarının inkişafı Dövlət Proqramının (2011-2020-ci illər) icrası üçün zəruri texniki, təşkilati, məlumat dəstəyini təmin edəcək.

DB-nın ölkə üzrə meneceri C.Ouen isə öz çıxışında bildirib ki, layihənin 4 əsas icra komponenti mövcuddur. Bu, bazar infrastrukturunun təkmilləşdirilməsi və avtomatlaşdırılması, hüquqi və tənzimləyici bazanın təkmilləşdirilməsi və gücləndirilməsi, tələbatın stimullaşdırılması, habelə potensialın gücləndirilməsidir.

İmzalanma mərasimində iştirak edən Nazirlər Kabineti Aparatının şöbə müdiri Nail Fətəliyev Azərbaycan hökuməti ilə Dünya Bankı arasında ötən dövr ərzində aparılan əməkdaşlıq, məsləhətləşmələr haqqında danışıb və qeyd edib ki, bu, tərəflər arasında 1995-ci ildən indiyədək imzalanan sayca 52-ci layihədir.

SECO-nun Azərbaycandakı nümayəndəsi Nailə Səfərova bildirib ki, ölkə hökuməti ilə İsveçrə təşkilatı arasında əməkdaşlıq əlaqələri 10 il öncə qurulub və ötən dövr ərzində SECO müxtəlif layihələrin icrası üçün Azərbaycana ümumilikdə 70 mln. dollar həcmində qrant ayırıb. Bu vəsaitlər ölkədə qanunvericilik bazasının təkmilləşdirilməsi və formalaşdırılması, maliyyə sektoru və regionların inkişaf etdirilməsinə sərf olunub. Yeni layihənin icrası üçün ayrılan qrant isə öz növbəsində iki əsas komponentin həyata keçirilməsinə – qanunvericilik bazasının təkmilləşdirilməsi və yeni maliyyə alətlərinin yaradılmasına yönəldiləcək.