Maliyyə

Ana səhifə

Maliyyə

Azərbaycan Qiymətli Kağızlar üzrə Dövlət Komitəsinin sədri Rüfət Aslanlı: «İnvestisiya fondları banklarla ciddi rəqabət aparmaq iqtidarında olacaq»

22 sentyabr 2011 12:34 (UTC +04:00)

Bakı. Nicat Mustafayev – APA-Economics. Azərbaycanda investisiya fondlarının yaradılması ilə bağlı potensial investorlar tərəfindən Qiymətli Kağızlar üzrə Dövlət Komitəsinə (QKDK) hələ rəsmi müraciət daxil olmayıb. Buna baxmayaraq, fondların yaradılmasına investorlar tərəfindən ciddi maraq göstərilir və hazırda onlar, o cümlədən xarici təşkilatlar tərəfindən yerli bazarın durumu, inkişaf perspektivləri və qanunvericilik bazası araşdırılır. «APA-Economics»in məlumatına görə, bunu QKDK-nın sədri Rüfət Aslanlı bildirib.

R.Aslanlı qeyd edib ki, hazırkı mərhələdə investisiya fondlarının yaradılması ilə bağlı rəsmi müraciətlərin olmaması anlaşılandır: «Çünki bu sahədə qanunvericilik bazasının tam formalaşması yenicə başa çatıb».

QKDK rəhbəri həmçinin vurğulayıb ki, bank təşkilatlarının maliyyələşdirmə sahəsində fəaliyyət prinsiplərindən fərqli olaraq investisiya fondları əsasən orta və iri kapital tutumlu layihələrin icrasına sərmayə yönəldəcək: «Həmçinin əminəm ki, investisiya fondları vəsaitlərin cəlb edilməsi sahəsində banklarla ciddi rəqabət aparmaq iqtidarında olacaq».