Maliyyə

Ana səhifə

Maliyyə

Azərbaycanda Mərkəzləşdirilmiş Kredit Reyestrinə müraciətlər bu il 2 dəfə artıb

03 noyabr 2011 11:58 (UTC +04:00)

Bakı. Əli Əhmədov – APA-Economics. Bu ilin yanvar-sentyabr aylarında Azərbaycan Mərkəzi Bankı (AMB) yanında Mərkəzləşdirilmiş Kredit Reyestrinin (MKR) xidmətlərindən 42 bank istifadə edib.

Reyestrdən «APA-Economics»ə verilən məlumata görə, bu dövr ərzində reyestrə 368 054, o cümlədən banklar tərəfindən potensial borcalanlar üzrə 366 962 sorğu daxil olub. Ötən ilin eyni dövrü ilə müqayisədə MKR-ə edilən sorğuların sayı 2,14 dəfə artıb.

Eyni zamanda, kredit tarixçəsi borcalanların özünü də maraqlandırmağa başlayıb – hesabat dövründə 1 092 şəxs öz kredit hesabatını əldə etmək məqsədilə MKR-ə müraciət edib. Bu isə ötən ilə nisbətən 5 dəfə çoxdur.

Təhlil olunan dövr ərzində MKR-də haqqında məlumat toplanan borcalanların sayı 1 100 715-ə, kredit məlumatlarının sayı isə 2 570 339-a çatıb. Həmçinin, Reyestrdə 364 645 nəfər zamin qeydiyyata alınıb.

Xatırladaq ki, 2005-ci ildən fəaliyyətə başlayan MKR-ə 2005-ci ildə 319, 2006-cı ildə 5 302, 2007-ci ildə 12 966, 2008-ci ildə 13 260, 2009-cu ildə 74 393, 2010-cu ildə 257 045 sorğu göndərilib. MKR-dən verilən məlumata görə, avqust ayından fiziki şəxslər üzrə vahid eyniləşdirmə kodları tətbiq edilib və bununla əlaqədar bir sıra statistik rəqəmlərdə dəqiqləşdirmələr aparılıb.