Maliyyə

Ana səhifə

Maliyyə

Azərbaycanın peşə məktəblərində bank mütəxəssisləri hazırlanacaq - ARAŞDIRMA

Azərbaycanın peşə məktəblərində bank mütəxəssisləri hazırlanacaq - <font color=red>ARAŞDIRMA</font>

21 noyabr 2011 08:37 (UTC +04:00)

«APA-Economics»in məlumatına görə, Nazirlər Kabinetinin qərarı ilə təsdiqlənmiş «İlk peşə-ixtisas təhsili üzrə ixtisasların Təsnifatı»na əsasən, peşə məktəblərində tədris olunan peşələrin sayı kəskin artırılıb. Qeyd edək ki, adı çəkilən sənəd peşə məktəblərində tədris olunan ixtisasları göstərir.

Yeni təsnifatda iqtisadi peşələrin tədrisi genişləndirilib. Belə ki, peşə məktəblərində bank işi ixtisası üzrə də kadrlar hazırlanacaq və bura nəzarət işi (əmanət bankında) və xəzinədar peşələri aiddir. Digər maraqlı ixtisas mühasibatlıq işinə aiddir – peşə məktəblərində bu sahə üçün aid iki ixtisas – mühasib və əməliyyatcı-mühasib hazırlanacaq. Peşə məktəbində sığorta agenti, reklam işçisi, kommersiya agenti, nəzarətci-xəzinədar, turizm agenti, alış və təchizat üzrə agentlər də hazırlanacaq.

Ümumiyyətlə, yeni sənədə əsasən, peşə məktəblərində turizm ixtisaslarına geniş yer ayrılıb. Belə ki, peşə məktəblərində dağ-xizək turizm növü üzrə bələdçi, ekoturizm üzrə bələdçi, milli park bələdçisi, yerli bələdçi və s. ixtisaslar tədris olunacaq.

İlk dəfə olaraq peşə məktəblərində zərgərlər də hazırlanacaq. Yeni təsnifata əsasən, peşə məktəblərindəki ixtisaslara ağac üzərində oyma, milli oyma, dekorativ rəssamlıq da daxil edilib.

Yeni peşələrin siyahısına informasiya-kommunikasiya texnologiyası və hesablama texnikasının təmiri və servisi xidməti üzrə peşələr də daxil edilib. Bura kompyuterlərin təmiri və xidməti üzrə texnik, lokal şəbəkələrə xidmət üzrə texnik, veb-dizayner, kompyuter operatoru kimi populyar peşələr salınıb. Peşə məktəblərində tibbi avadanlığın (narkoz-tənəffüs aparatları və elektron tibbi cihazlar) təmiri üzrə mütəxəssislər də hazırlanacaq. Burada mobil telefonların təmiri ustası peşəsinə də yiyələnmək mümkün olacaq.

Qeyd edək ki, rəsmi məlumatlara görə, 2010-cu ildə Azərbaycanın peşə liseylərini bitirən 10 602 məzundan yalnız 3 670-i işlə təmin olunub. Onlardan isə yalnız 2 459-u ixtisasına uyğun işləyir. Bundan başqa, mütəxəssislər ölkənin əmək bazarı ilə təhsil sistemi arasında ciddi disbalansın olduğunu bildirirlər.

Milli Məclisin Elm və təhsil Komitəsinin sədri Şəmsəddin Hacıyev «APA-Economics»ə bildirib ki, ümumilikdə ölkədə hər il orta məktəbi 130-150 min gənc başa vurur. Onların təqribən 30 mini ali məktəblərə, 14-15 mini orta ixtisas məktəblərinə, təqribən 12 min gənc isə peşə məktəblərinə üz tutur, qalanlar isə faktiki olaraq peşəsiz qalır. Orta məktəbi bitirən məzunların təqribən 60%-nin əmək bazarında peşəsiz qaldığını Baş Məşğulluq Xidməti də təsdiqləyir.

Ümumilikdə, yeni təsnifatda peşə məktəblərində tədris olunan ixtisasların sayı 4 dəfə artırılıb. Belə ki, 2002-ci ildə təsdiqlənmiş əvvəlki klassifikatora əsasən, kadr hazırlığının 218 ixtisas üzrə aparılması nəzərdə tutulurdu.

Ötən dövr ərzində ölkədə baş verən sosial-iqtisadi inkişaf əmək bazarının tələbatını da dəyişib. Təhsil Nazirliyi texniki peşə təhsili şöbəsinin müdiri Namiq Məmmədov «APA-Economics»ə açıqlamasında bildirib ki, yeni sənəddə həm ixtisasların sayı təqribən 4 dəfə artırılaraq 800-ə çatdırılıb, həm də onlar iqtisadiyyatın daha çox sahələrini əhatə edir: «Yeni sənəd peşə təhsili sistemi ilə iqtisadiyyat arasında, daha dəqiqi işəgötürənlər arasında əlaqələrin güclənməsinə imkan verəcək».

Yeni peşələr üzrə tədris artıq növbəti tədris ilindən başlanacaq. Təhsil Nazirliyindən «APA-Economics»ə ya verilən məlumata görə, 2012-ci ilin sentyabrında qəbul planı yeni təsnifat üzrə veriləcək.