Maliyyə

Ana səhifə

Maliyyə

«Unibank» yeni aksiya keçirir

22 noyabr 2011 12:28 (UTC +04:00)

Bakı. Vahab Rzayev – APA-Economics. Bu həftədən etibarən «AL Kart» və nağd kreditlər alan müştərilər üçün «Unibank» ASC yeni aksiyaya başlayıb. Bankdan «APA-Economics»ə verilən məlumata görə, dekabr ayının 20-dək Bankın xidmət şəbəkəsində adı çəkilən kreditlər alan hər beşinci müştəriyə «Mobitel» zəmanətli «Nokia X1» mobil telefonu hədiyyə verilir.

«AL Kart» və nağd kreditlərin rəsmiləşdirilməsi prosedurası da sadələşdirilib. Belə ki, müştərilərin təsdiqlənmiş aylıq gəlirləri müvafiq olaraq «AL Kart» krediti üçün ən azı 200 manat, nağd kredit üzrə isə cəmi 85 manat təşkil edə bilər. Kreditlər Bakı və Sumqayıt şəhərlərinin sakinlərinə 1 500 manatadək, digər bölgələr üçün isə 1 000 manatadək verildiyi halda, zamin və girov tələbi irəli sürülmür.

Qeyd edək ki, iki kartlı «Nokia X1» mobil telefonu hədiyyə alacaq müştərilərin təyin edilməsi xüsusi proqram təminatı vasitəsilə aparılır. Bu zaman «AL Kart» və nağd kreditlərin alınması üzrə ardıcıllıq, kompüter sistemində müştərilər tərəfindən edilən müraciətlərin qeydə alındığı andan hesablanır. Qaliblər mərkəzləşdirilmiş qaydada «Unibank»ın bütün filial və şöbələri üzrə müəyyən edilir.