Maliyyə

Ana səhifə

Maliyyə

Azərbaycan-Koreya iqtisadi əməkdaşlıq üzrə işçi qrupunun iclası keçirilib

25 aprel 2012 06:38 (UTC +04:00)

Bakı. Nicat Mustafayev – APA-Economics. Bakıda Azərbaycan və Koreya arasında iqtisadi əməkdaşlıq üzrə işçi qrupunun IV iclası keçirilib. Azərbaycan İqtisadi İnkişaf Nazirliyindən «APA-Economics»ə verilən məlumata görə, iclasda Azərbaycan və Koreya tərəfindən aidiyyəti dövlət qurumlarının nümayəndələri iştirak ediblər.

Tədbirdə çıxış edən İqtisadi İnkişaf Nazirliyinin Aparat rəhbəri Samir Vəliyev Azərbaycanın sosial-iqtisadi nailiyyətləri barədə ətraflı məlumat verib, Azərbaycanda xarici ölkələrlə, o cümlədən Koreya ilə əlaqələrin genişlənməsinə xüsusi önəm verildiyini qeyd edib, mövcud iqtisadi əlaqələrin daha da genişləndirilməsi üçün böyük potensialın olduğunu diqqətə çatdırıb.

Koreyanın Bilik İqtisadiyyatı Nazirliyinin baş direktoru Taehi Vu (Taehee Voo) ölkəsinin Azərbaycanla əlaqələrə böyük əhəmiyyət verdiyini və əməkdaşlığın genişləndirilməsində maraqlı olduğunu vurğulayıb, əlaqələrin bundan sonra da yüksələn xətlə inkişaf edəcəyinə əmin olduğunu bildirib.

Koreya Sənaye Kompleksi Korporasiyasının bölmə rəhbəri Hyeyounq Ço (Hyeyoung Cho) «Xüsusi İqtisadi Zonalar və Sənaye Parkları üzrə əməkdaşlıq», Koreya Ticarət Sığorta Korporasiyasının baş meneceri Subuem Park (Subuem Park) «İxrac Kredit Agentliyi vasitəsilə ixracın maliyyələşdirilməsi», «SK C&C» şirkətinin baş meneceri Seonqpil Yanq (Seongpil Yang) «Dəmir yolu sisteminin inkişafı», Koreya Yeni və Bərpa Olunan Enerji Korporasiyasının bölmə rəhbəri Cunqtae Pak (Jungtae Pak) «Bərpa olunan enerjinin inkişafı üzrə əməkdaşlıq» mövzularında təqdimatla çıxış ediblər.

Komissiyanın iclasında iki ölkə arasında sənaye, kənd təsərrüfatı, tikinti, İKT, energetika, və s. sahələrdə əməkdaşlığın inkişafı, iş adamları arasında əlaqələrin gücləndirilməsi məsələləri müzakirə edilib.