Maliyyə

Ana səhifə

Maliyyə

Avropa Birliyinin bütün ölkələri 120 mlrd. dollarlıq tədbirlər paketini qəbul edib

29 iyun 2012 09:11 (UTC +04:00)

Bakı – APA-Economics. Avropa Birliyinin (AB) üzvü olan bütün ölkələrin, o cümlədən İtaliya və İspaniyanın liderləri avrozona ölkələrinə yardım olunması və yeni iş yerlərinin yaradılması üçün nəzərdə tutulan 120 mlrd. dollarlıq tədbirlər paketinin qəbul olunmasına razılaşıb.

“APA-Economics”in BBC-yə istinadən xəbərinə görə, İtaliya və İspaniya ilə danışıqlar 13 saatdan artıq davam edib.

İtaliyanın baş naziri Mario Monti və onun ispan həmkarı Mariano Raxoy bildiriblər ki, Almaniya onların istiqrazları üzrə gəlirlilik dərəcəsinin endirilməsinə dair qısamüddətli tədbirləri təsdiqləməyincə, onlar uzunmüddətli təşəbbüsü yenidən dəstəkləməyəcəklər.

Fransa prezidenti Fransua Olland İtaliya və İspaniyanı müdafiə edib. Nəticədə Almaniya güzəştə getməyə məcbur olub. Bunun müqabilində Almaniya kansleri Angela Merkel AB maliyyə orqanlarının nəzarətçi səlahiyyətlərinin artırılmasına nail olub. AB-nin bank sektorunda nəzarətçi orqanının yaradılması nəzərdə tutulur ki, onun da səlahiyyətləri bütün AB ərazisində keçərli olacaq.

Avrozonanın borc böhranı ilə mübarizəsinə dəstək məqsədilə vəsait Avropanın struktur fondları, Avropa İnvestisiya Bankı və digər mənbələr hesabına ayrılacaq.