Maliyyə

Ana səhifə

Maliyyə

«Access Bank»ın Bakıda yeni filialı açılıb

17 avqust 2012 10:58 (UTC +04:00)

Bakı. Elnur Hüseynquluyev – APA-Economics. «Access Bank» QSC sayca 34-cü, «Badamdar» adlı filialını istifadəyə verib. Bankın baş ofisindən «APA-Economics»ə verilən məlumata görə, bankın digər filialları kimi yeni filial da fiziki və hüquqi şəxslərə tam çeşidli maliyyə xidmətləri təqdim edir.

Bu xidmətlərə cari və əmanət hesablarının, həmçinin «Visa» plastik kartlarının açılması, ölkə daxilində və xarici ölkələrə pul köçürmələri, kiçik və orta biznes, habelə istehlak kreditlərinin rəsmiləşdirilməsi aiddir.

«Badamdar» filialının direktoru Cahangir Eyyubovun sözlərinə görə, 2009-cu ildən etibarən Badamdar qəsəbəsində «Access Bank»ın filialı fəaliyyət göstərib. Cari ilin iyul ayının əvvəlində filialın adının dəyişdirilməsi və Lökbatan qəsəbəsinə köçürülməsi üçün Azərbaycan Mərkəzi Bankı tərəfindən lisenziya alınıb. «Filialın köçürülməsi «Binə» və «Sədərək» bazarlarında çalışan müştərilərimizə xidmətlərimizdən istifadə etmələri üçün rahatlıq yaratdı. Amma «Badamdar» filialının çoxsaylı müştərilərini nəzərə alaraq, bank rəhbərliyi Badamdar qəsəbəsində filialın işini bərpa etməyə qərar verib. Bununla, «Access Bank» öz müştəriləri üçün maksimal əlverişli şərait yaratmaq istiqamətində siyasətini davam etdirir»,- deyə S.Eyyubov bildirib.

Xatırladaq ki, «Access Bank» 2002-ci ilin oktyabr ayında Azərbaycan Mikromaliyyələşdirmə Bankı kimi fəaliyyətə başlayıb və 2008-ci ilin sentyabr ayında brendini dəyişib. Bankın təsisçiləri rolunda Avropa Yenidənqurma və İnkişaf Bankı (20%), Beynəlxalq Maliyyə Korporasiyası (20%), Qara Dəniz Ticarət və İnkişaf Bankı (20%), Almaniyanın KfW Bankı (20%), «AccessHolding» (16,53%) və «LFS Financial Systems GmbH.» şirkəti (3,47%) çıxış edir.