2023-cü ildə dövlət büdcəsi xərcləri 6 ay proqnozdan artıq, 6 ay isə proqnozdan az icra olunub.
“APA-Economics” xəbər verir ki, bu barədə “2023-cü ilin dövlət büdcəsinin icrası haqqında” qanun layihəsinə və 2023-cü il dövlət büdcəsinin icrasına dair illik hesabata Hesablama Palatasının rəyində qeyd edilib.
Hesabatda bildirilib ki, proqnozla müqayisədə ən yüksək icra səviyyəsi 144,7% təşkil etməklə dekabr ayında qeydə alınıb. Belə ki, dekabr ayında 7 milyard 302,8 mln. manat xərc edilmişdir ki, bu da 2023-cü ildə icra olunmuş cəmi dövlət büdcəsi xərclərinin 20%-nə bərabərdir.
Qeyd edilib ki, Ötən il ilk 11 ay üzrə orta aylıq icra göstəricisinə (2650,5 mln. manat) nəzər salsaq, dekabr ayında icra edilmiş xərclərin müvafiq göstəricidən 2,8 dəfə çox olduğunu deyə bilərik. Dekabr ayında yüksək icraya digər amillərlə yanaşı, il ərzində büdcəyə yenidən baxılaraq xərclərin artırılması və bunun ilin ikinci yarısında həyata keçirilməsi də təsir edir. Belə ki, dövlət büdcəsi xərclərinin rüblük bölgüsü yenidən aparılmaqla, 3-4-cü rüblər üzrə xərclər 3271,5 mln. manat və ya 6,3% artırılıb.
Hesablama Palatasının əvvəlki rəylərində də bildirildiyi kimi, xərclərin ilin sonunda icra edilməsi büdcə vəsaitlərinin akkreditiv hesablara yönəldilməsinə, bank hesablarında istifadəsiz saxlanılmasına, bununla da ilin sonunda qalıq vəsaitlərin vahid xəzinə hesabına geri qaytarılmamasına şərait yaradır. Qeyd olunan hal Hesablama Palatası tərəfindən həyata keçirilən bəzi kənar dövlət maliyyə nəzarəti tədbirləri zamanı da aşkar edilmişdir. Qurumlar tərəfindən Hesablama Palatasına 2023-cü il büdcə vəsaitlərindən istifadə ilə bağlı təqdim edilmiş məlumatlar da bu faktı təsdiqləmişdir. Belə ki, seçmə qurumlarla əhatə edilmiş təhlillər 2023-cü il üzrə ayrılmış vəsaitlərdən təxminən 300 mln. manata yaxın vəsaitin akkreditiv hesablara yönəldildiyini, 1 mlrd. manatdan çox vəsaitin isə bank hesablarında istifadəsiz qaldığını göstərib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
